Кој е условот на „независните“ за Законот за јавното обвинителство?
Во зависност од тоа како ќе се прифаќаат амандманите што ги подготвивме, така ќе го градиме нашиот став за гласањето за Законот за јавното обвинителство, вели координаторката на независнта пратеничка група на ВМРО-ДПМНЕ Емилија Александрова.
Власта пред нов предизвик во обидот да обезбеди 80 пратеници за Законот за јавното обвинителство. Независната пратеничка група која сега брои 7 народни избраници, поради неизвесната позиција на поранешната министерка за култура Елизабета Канчевска Милевска која најверојатно со едната нога е во старата база на ВМРО-ДПМНЕ, е во преговори со Министерството за правда.
Препорачано
Оттаму за „Слободен печат“ велат дека нивната поддршка ќе зависи од тоа колку власта ќе биде подготвена да ги прифати нивните амандмани, кои ги селектирале во 4 области. Првата, велат за „Слободен печат“ е изборот на шефот на одделот за организиран криминал и корупција. Останатите амандмани, групирани во втора, трета и четврта област не ги откриваат. Велат дека треба да се почека за да не му се наштети на преговарачкиот процес се со цел да се донесе добар Закон за јавното обвинителство.
Координаторката на независната пратеничка група на ВМРО-ДПМНЕ Емилија Александрова не негира дека во оваа група на амандмани ќе се побара „бомбите“ произлезени од прислушуваните разговори да не бидат користени во судските процеси како докази туку како индиции.
– Преговараме со Министерстово за правда и сметаме дека нашите амандмани се издржани и се во насока да го подобрат квалитетот на Законот на што укажаа и голем дел од експертите на јавната дебата. Ќе видиме понатму како ќе се движат работите, во зависност од тоа како ќе се прифаќаат амандманите, така ќе го градиме нашиот став за гласањето за Законот за јавното обвинителство – вели Александрова за „Слободен печат“.
Собраниски извори велат дека пред 10 февруари Законот нема да се најде на седница па макар и независните да гласаат за него. Математиките се дека во моментов нема 80 пратеници, не само поради преговорите со независната пратеничка група, туку и поради тоа што дел од пратениците се приватно или службено отсутни. Пратеникот Артан Груби е во Америка на молитвен појадок кај Трамп, а во САД е и најстариот пратеник од нивните редови Бранко Манојловски. Неизвесен е и пратеникот Панче Минов.
И додека власта е во трка со времето за да обезбеди двотретинско мнозинство за Законот за јавното обвинителство, собраниски извори посочуваат дека се е можно бидејќи е потребно само еден ден тој да се донесе доколу има консензус.
