Синоќа се одржа финалето на Евровизија 2025, а победник е претставникот на Австрија, Јоханес Пич, 23-годишен уметник со австриско-филипинско потекло, познат под сценското име Џеј Џеј.

Роден е во Виена, а пораснал во Дубаи, а на Евровизија се претстави со моќната балада „Wasted Love“, која комбинира поп и опера, а кулминира во експлозивни техно ритми.

Џеј Џеј студира оперска музика на Универзитетот за музика и уметност во Виена, а исто така посетувал и оперско училиште при Виенската државна опера. Начинот на кој пее покажува дека зад себе има долгогодишно искуство. Се надевал дека ќе ги следи стапките на австриската победничка на Евровизија, драг иконата Кончита Вурст.

– Отсекогаш бев опкружен со музика – таа е огромен дел од мојот живот откако знам за себе. Почнав да пеам многу рано, и со текот на времето сфатив дека изразувањето преку музика ми доаѓа најприродно. Почнав да настапувам во училиште и на локални настани, а потоа почнав да пишувам свои песни. Тогаш знаев дека сакам професионално да се занимавам со музика – изјави тој за Индепендент.

Зборувајќи за тоа како дошло до тоа да ја претставува Австрија на овогодинешната Евровизија, тој вели дека целиот процес бил полн со емоции:

– Навистина неверојатна чест! Сè започна кога ја пратив мојата песна и поминав низ процесот на селекција. Кога ми кажаа дека ќе ја претставувам Австрија, бев преплавен со емоции, секако на позитивен начин. Тоа е огромна одговорност, но и остварување на сон. Горд сум што можам да ја презентирам мојата музика на толку голема сцена и да ја споделам со Европа и светот – додаде овој млад човек пред натпреварот и откри дека би сакал да победи на Евровизија, а очигледно желбата му се исполни.

-Ако победам, веројатно прво би заплакал! А потоа сигурно би славел со мојот тим, пријателите и семејството кои ме поддржуваа на секој чекор од патот. Можеби ќе направиме огромна забава, ќе се забавуваме цела ноќ и ќе изедеме премногу торта. Но, искрено, веќе чувствувам дека самото ова искуство е огромна победа – рече тој непосредно пред финалето.

Кое е значењето и инспирацијата зад песната „Wasted Love“?

„Wasted Love“ зборува за емоционалните последици од неуспешна врска, за болката кога некому му го даваш своето срце, а тој вистински не го цени тоа. Тоа е лична и искрена песна, но многумина можат да се поистоветат со неа. Но, воедно зборува за наоѓање сила во ранливоста и за личен раст преку такво искуство.