Моментално, целото медиумско внимание е насочено кон мемоарите на принцот Хари, во кои тој ја раскажува својата животна приказна, како дел од британското кралско семејство.

Сепак, иако принцот Хари е потпишан како главен автор на книгата „Spare“, тој соработувал со писателот Џ.Р. Мохрингер во процесот на пишување на книгата, пишува „Пипл“.

„Писателите во сенка го пренесуваат туѓиот глас, а многу често се работи за многу познат глас, и го конструрираат во книга со сижетен развој и незаборавни ликови“, пишува „Њујорк тајмс“.

Мохрингер е познат писател во сенка, кој досега има напишано неколку мемоари за важни познати личности, но и за самиот себеси.

https://t.co/diuQdJRn1j pic.twitter.com/HkLnT8OZy8

— J.R. Moehringer (@JRMoehringer) January 11, 2023

Бил новинар во „Њујорк тајмс“

Џ.Р. Мохрингер е роден во Њујорк, каде што го поминал детството заедно со неговата самохрана мајка. Тинејџерските денови ги поминал во Скотсдејл, Аризона, каде што завршил средно училиште. Своето високо образование го завршил на Унивезитетот Јејл во 1986 година.

Својата новинарска кариера ја започнал во еминентниот дневен весник „Њујорк тајмс“, каде имал почетна работна позиција како асистент. Потоа се преселил во Колорадо, каде што работел за дневниот весник „Роки маунтејн њуз“. Во 1994 година, тој станал репортер за „Лос Анџелес тајмс“.

Тој е романсиер

Иако е општо познато дека е писател во сенка, благодарение на неговата последна соработка со принцот Хари, Мохрингер е автор и на неколку свои книги.

Тој ја напишал книгата „ Sutton“ во 2012 година, која е биографија на криминалецот Вили Сатон.

Сепак, неговите мемоари „The Tender Bar“ доживеале најголем успех кај литературните критичари.

Уште од најмала возраст, Мохрингер растел без татко. Татко му, кој бил диџеј, починал уште пред да ги чуе првите зборови на своето дете. Неговите мемоари се своевиден портрет на едно момче кои се обидува да стане маж.

Книгата „The Tender Bar“ била прогласена за една од најдобрите таа година од страна на „Њујорк тајмс“, „Ентертејмент викли“, „Њујорк магазин“ и други.

Книгата доби и своја филмска адаптација во 2021 година, со актерот Бен Афлек во главната улога.

Писател во сенка и на други книги

Покрај книгата на принцот Хари, Мохрингер е писател во сенка и на други книги на познати личности.

Тој работел и на мемоарите на тенисерот Андре Агаси во 2009 година и на меморарите на соосновачот на „Најк“, Фил Најт во 2016 година.

Добитник на Пулицерова награда

Новинарската кариера на Мохрингер го достигнала својот врв во весникот „Лос Анџелес тајмс“, за кој напишал повеќе одлични статии.

Во 1998 година, тој станал финалист за Пулицеровата награда, за неговата статија „Resurrecting the Champ“.

Две години подоцна, Мохрингер ја освоил оваа награда, која се смета за највисоко признание во областа на новинарство во печатените медиуми, за статијата „Crossing Over“.

Повеќе на темата:

Книгата на принцот Хари продадена во над 1,4 милиони примероци за еден ден

Со голи раце ископал гроб: Принцот Хари во мемоарите напиша за спонтаниот абортус на Меган

„Ја најдов Мег на подот, лелекаше“: Хари ги откри смс-пораките за караницата помеѓу Кејт и Меган