Европската комисија го објави списокот на американски производи кои би можеле да подлежат на царини откако администрацијата на Доналд Трамп во средата воведе царини од 25 отсто за челик и алуминиум.

На списокот од 99 страници доминираат месото, живината, овошјето и зеленчукот и алкохолните пијалоци. Вклучени се и гуми за џвакање, молитвени мониста, вејп производи, никотински фластери до женско неглиже.

Како што коментира Политико, некои производи изгледаат како „напад на американскиот начин на живот“, како што се облека за на отворено, шатори, алатки за работилници и домашни апарати. Други вклучуваат тешки производи, како што се градежна опрема, машини за чистење снег и мотоцикли.

Претходно во средата, Комисијата објави двостепена одмазда што покрива извоз од ЕУ во вредност од 26 милијарди евра, што далеку го надминува износот на трговската војна за време на првиот мандат на Трамп.

Доколку не дојде до решение преку преговори, ЕУ ќе воведе царини од 8 милијарди евра од 1 април за американски производи, вклучувајќи ги и култните американски производи како што се мотоциклите на Харли-Дејвидсон, вискито и фармерките. А, од средината на април, ќе постави дополнителни контрамерки од 18 милијарди евра што е предмет на одобрување од земјите-членки на ЕУ.

Извршната власт на ЕУ започна анкета заснована на споменатата листа за да ги побара ставовите на оние кои се погодени од американските царини, поставувајќи краен рок за поднесување до 26 март.