Претседателот на Собранието Африм Гаши се однесува според прописите предвидени со закон и според протоколот за безбедност, во согласност со неговата висока позиција и важноста на стандардите за безбедност и државен протокол, реагираат од коалицијата Вреди, во врска со недоумиците дали тој смеел да оди на свадба во Косово со придружба од државно обезбедување и службено возило.

„Оваа одлука е во согласност со вообичаената практика за високи службеници, со цел да се обезбеди заштита и непречено извршување на неговите обврски. Всушност, обезбедувањето на Претседателот на Собранието е должно да го следи секое негово движење. И во случајот со посетата во Косово, која стана тема од некои опозициони настроени медиуми, нема никакво нарушување на овие стандарди и тоа може да се провери од сите заинтересирани страни. Имено, во отсуство на политичка агенда и стравувајќи за своето минато, некои опозициски партии се обидуваат преку искривување на вистината, да манипулираат со јавноста дека се работи за некое кршење на предвидените стандарди. Сепак, претседателот е посветен на целосна и транспарентна соработка за разјаснување на сите аспекти на тој настан, но и за секоја друга тема што ја засега јавноста“, се вели во соопштението на коалицијата Вреди.

Медиумот „Индекс“ објави видео на кое се гледа како службеното возило на Африм Гаши учествува во свадбена поворка во Косово. Од канцеларијата на Гаши потврдуваат дека видеото е точно, но тврдат дека немало злоупотреба на возилото. Тие објаснуваат дека користењето на возилото било оправдано и законско, бидејќи Африм Гаши бил придружуван од безбедносен персонал.