Неодамна од печат излезе книгата „Политиколошки вивисекции во етерот“ (политсоциолошка анализа и радиоразговори за состојбите во Македонија) на Свето Стаменов, политиколог, новинар на Македонското радио – Радио Скопје и еден од најплодните македонски публицисти, и на универзитетскиот професор, политиколог и истакнат македонски општественик Цане Т. Мојаноски.

Во книгата на читателската јавност ѝ се понудени содржините на 20 интервјуа реализирани во рамките на радиоемисиите „Кво вадис“, „Радио спектар“ и „Актуелно“ на Македонското радио – Радио Скопје во периодот од јануари 2018 година до средината на април 2022 година, временски период кој, според настаните што се случуваа во нив, е од особено значење за развојот на нашава земја, која со прифаќањето и потпишувањето на Преспанскиот договор, во својот назив ја вклучи одредницата Северна, како и со потпишувањето на Договорот за соработка со соседна Република Бугарија, на општествен план предизвика неколку значајни процеси.

Токму затоа, повеќето интервјуа се посветени на анализата на внатрешнополитичките односи во светлината на настаните што му дадоа белег на тој период, како што се демократските процеси, постизборните активности и специфичности од развојот на Македонија, нејзиното граѓанство, определени институции поврзани со македонскиот народ, но и политики и состојби поврзани со граѓаните и граѓанското живеење.

Притоа, посебен акцент е ставен врз партиската патронажа и стапиците на демократијата, потребата од реформирање на политичките партии во Македонија и од напуштање на партиската бизнис логика, но и врз состојбите во определени подрачја од внатрешнополитичкиот живот, како што се состојбите во образованието и меѓупартиските разговори, здравствената криза предизвикана од пандемијата на коронавирусот, а посебно се анализирани значењето и активностите на претставниците на Македонија на Минхенскиот безбедносен форум, мултилатералниот пристап во креирањето и реализирањето на европските цели и вредности, како и очекувањата што ги имаат македонската држава и нејзините граѓани во периодот што доаѓа.

(Текстот е објавен во „Културен печат“ број 131, во печатеното издание на весникот „Слободен печат“ на 4-5 јуни 2022)