Во Културно-информативниот центар – Скопје на 5 јуни, во 19:19 часот, во Салон „Империјал 1“ ќе се одржи промоција на поетската збирка „Маслина и младост“ од Гордана Михаилова Бошнакоска во издание на „Макавеј“. Книгата ќе ја промовираат Бранко Цветкоски и Гоце Смилевски, стиховите ќе ги интерпретираат артистите Софиа Насевска Трифуновска и Борче Начев.

Гордана Михаилова Бошнакоска е родена на 1 септември 1940 година во Битола. Студирала на Филолошкиот факултет при универзитетот „Св. Кирил и Методиј“ во Скопје. Пишува поезија, проза, есеи за литература и уметност (сликарство и скулптура). Има објавено петнаесет збирки поезија, од кои првата е „Времето го нема“ од 1965 година, а последната е со наслов „Килибар и младост“ од 2024 година.

Наградата „Браќа Миладиновци“ ја доби за збирката „Планини од картонски кутии“, наградата „Ацо Шопов“, што ја доделува Друштвото на писателите на Македонија, ја доби за збирката „Песна на ридот“, а ја има добиено и наградата „Празник на липите“. Застапена е во сите поетски антологии во Македонија и странство, како и во панорамски прикази.

Македонската телевизија има снимено две емисии за нејзината поезија и проза, додека Македонското радио ја застапи во звучната антологија на македонската поезија. Носителка е на признанието Витез на пишаниот збор, како и на највисокото признание на ДПМ „Книжевен жезол“ за целокупното творештво. Ги има објавено збирката раскази „Босфорско лето“ и романот „Потрага по приказна“. Настапувала на бројни литературни манифестации во Македонија и во странство.

Нејзината поетска збирка „Килибар и младост“ е втора од проектот „Поетска трилогија“, во која се надоврзува на претходната „Мед и младост“, а третата книга го носи насловот „Маслина и младост“. Целиот проект во суштина ја поставува дилемата на вечноста и минливоста.