Скопската галерија „Метаноја“ во соработка со „Нушиќ фондација“ од Белград, ќе ја промовира книгата „Бен Акиба: о нама“ со изложба на карикатури со ликот на Бранислав Нушиќ во авторство на карикатуристот Зоран Товирац – Тоцо.

Промоцијата на книгата и отворањето на изложбата ќе се одржат на 24 јануари, од 18 часот, во галеријата „Метаноја“ на ул. „Максим Горки“ бр. 19 во Скопје.

Настанот ќе го отвори директорот на Галерија „Метаноја“ м-р Нада Милкова. На публиката ќе ѝ се обратат директорот на „Нушиќ фондација“, Небојша Нушиќ, внук на Бранислав Нушиќ, скулпторот Синиша Новески, претставник на „Фондација Нушиќ“ за Македонија, и д-р Коста Милков, рецензент на книгата.

Бранислав Нушиќ (1864 – 1938) е еден од најзначајните комедиографи, сатиричари и критичари на Балканот. Во текот на својата професионална кариера во одреден период работел како новинар, а бил и дипломат.