Клиниката за дерматологија во 2023 година слабо менаџирала со лековите за ретки болести, констатираше Државниот завод за ревизија во својот ревизорски извештај. Пациентите со ретки болести, дома имале залихи што не ги користеле. Од овие залихи лекови што им биле дадени за дома, на дури 39 проценти им истекол рокот – останале неискористени.

Во 2023 година примени се лекови од 37 милиони 434 илјади денари, а во рачните евиденции на клиниката издадените лекови кон пациентите се во износ од 27 милиони 394 илјади денари, што е помалку за 8 милиони 843 илјади денари во однос на евидентираните во регистарот. Во текот на ревизијата направен е попис и побарани се податоци од пациентите за видот и количината на лековите што ги имаат подигнато од Клиниката а поради природата на болеста ги немаат потрошено. Утврдено е дека пациентите располагаат со лекови во вредност од 31 милион 748 илјади денари од кои 39 проценти се лекови со поминат рок, наведува ревизорот.

Клиниката за дерматологија исто како и Онкологија,набавувала лекови без предлозите за нив да произлезат од стручен колегиум.

Два ласери од 10 милиони денари што биле набавени, фаќале прашина, а со нив можело да се прават козметички и естетски процедури што не ги покрива здравственото осигурување. Исто така, бројот на термини на клиниката за пациентите, бил значително помал отколку што се капацитетите.