Ќе му биде исполнета последната желба на Бора Чорба: Еве каде ќе биде погребан легендарниот музичар
Бора Ѓорѓевиќ, фронтменот на бендот „Рибља чорба“, почина на 72-годишна возраст. Неодамна беше примен во болница во Љубљана со тешка пневмонија. Тој бил лекуван со антибиотици и кислород, а по неколку дена поради влошување на состојбата бил ставен на вентилатор. Инаку, тој долго време се борел со тешка болест. Музичарот пред Нова година имал пневмонија, поради што го откажал концертот во Ниш.
Препорачано
Менаџерот на Бора, Бане Обрадовиќ за српски „Курир“ откри дека е во постојан контакт со семејството и проговори за погребот на легендарниот музичар:
– Зборував со семејството, се работи на документите. Засега не се знае кога неговото тело ќе биде пренесено во Србија, па затоа не се знаат ниту деталите за погребот. Мора да поминете низ процедурата во болница и сѐ друго. Бора ќе биде погребан во Чачак, тоа е неговата желба! Тој сепак остави неизбришлива трага со своите дела, нека почива во мир – изјави Бане за „Курир“.
Рок легендата Бора Ѓорѓевиќ ќе биде погребан во родниот град, потврди и градоначалникот на Чачак.
Во прошталните зборови што Милун Тодоровиќ, градоначалникот на Чачак, му ги упати на својот пријател Бора Ѓорѓевиќ, стои и исполнувањето на последната желба на прославениот рокер, кој треба да биде погребан во родниот град. Првиот човек на Чачак и Бора се долгогодишни пријатели.
– Нѐ напушти легендата на рокенрол сцената на нашата Србија и регионот, маестрален и ненадминат музичар, текстописец и фронтмен на најголемиот рок бенд „Рибља Чорба“. На 72-годишна возраст почина Бора Ѓорѓевиќ, икона на Чачак и човек кој за четири и пол децении музичко творештво остави неизбришлива трага во срцата на сите генерации. Откако одамна стана бесмртен за своите сонародници, тој се вброи во редот на најголемите легенди што ги родил овој град. Драг Боро, драг пријателе, ти благодарам за секоја строфа со која пораснав. Ти благодарам за секој совет и добар збор, а најголема благодарност што ме сметаш за пријател. Ви ветувам во мое име и во името на сите жители на Чачак, а тоа веќе го знаевте, дека никогаш нема да бидеш заборавен – рече Милун Тодоровиќ.
Тој додаде дека Чачак наскоро ќе има улица што ќе го носи името на Бора Ѓорѓевиќ, како што рече, „улица по која ќе чекорат некои нови, идни генерации, учејќи стихови и тонови кои никогаш нема да исчезнат од нивните сеќавања“.
– Ќе ти се исполни последната желба да бидеш погребан во родниот град и како што и самиот кажа, ќе се вратиш на падините на Јелица за да останеш засекогаш во Чачак – рече Тодоровиќ.
