Кинезите се познати коцкари. Иако владејачката Комунистичка партија ги задуши сите начини за кладење во Кина, статистиката покажува дека 80 % од Кинезите кои одат на одмор или ја напуштаат земјата, во другите држави ги посетуваат казината. Единствениот начин на кој Кинезите можат да се кладат, односно да добијат голема сума на пари од игри на среќа е државната лотарија.

Но, во време кога сѐ повеќе Кинези стануваат доволно богати за да можат да си дозволат патување низ светот, тоа ја зголеми желбата за кладење не само кај Кинезите, туку и кај другото население низ Азија, пишува британскиот неделен весник „Економист“.

Австралискиот тајкун, Џејмс Пекер, вели дека ова е одлична прилика за развивање на неговата индустрија во Азија. Според него, средната класа во Кина „ќе го смени светот“.

Во Југоисточна Азија има над 340 казина. Нивни најголеми корисници убедливо се Кинезите. Ова значеше голема трансформација во азиската индустрија за игри на среќа.

Се проценува дека 1 трилиони јуани (144 милијарди долари) пари од коцкање ја напуштаат кинеската економија секоја година.

Најголема добивка од кинеската забрана за коцкање доживеа Макао, која во моментов ужива статус на „рај за коцкарите од Кина“, откако излезе од португалското владеење во 1999 година.

Но, растот е широко распространет и низ останатиот дел на Азија. Бен Ли, шеф на „АјГамиИкс“, консултантска компанија за игри, вели дека никогаш нема да го заборави пристигнувањето во австралиските казина на кинески туристи: „Одеднаш богатите од Југоисточна Азија не беа битни“.

Останатите земји од Азија веднаш сакаа да бидат дел од оваа игра. Сингапур ви 2010 година го легализираше коцкањето, отварајќи две казина, кои веднаш се наполнија со огромен профит. Во 2016 година, Јапонија реши да ја укине забраната за казината, иако во таа земја не се очекува да се отвори ново казино се до последните години на оваа деценија.

Дури и Русите сакаа дел од овој подем на коцкањето во тој дел од светот. Тие имаа план од Владивосток да направат „руски Лас Вегас“ за кинеските љубители на коцката.

Но, овие азиски земји решија да ги заштитат своите граѓани од кинескиот прилив на коцкање, донесувајќи неколку правила со кои се ограничува зависноста кај домашното население.

Приливот на кинески пари од казината во соседните земји продолжува да расте. Затоа, кинескиот претседател Си Џипинг се обидува да ги ограничи коцкањето за Кинезите и надвор од границите на државата.

Си им порача на властите во Макао повеќе да се фокусираат на туризмот и конференциите, а не на казината.

Тој ги заостри контролите за перење пари и ги притисна агенциите кои им помагаат на коцкарите да ги избегнат строгите контроли на капиталот во Кина. Секој што ќе му помогне на кинески државјанин да се коцка во странство се соочува со затворска казна до десет години.
Со оваа политика на Кина, соседните земји се надеваат на други гости. За нив е многу тешко да му се спротистават на Пекинг.

Во време кога перењето пари во Макао стана поризично и потешко, тамошните казина под кинеска сопственост драстично се намалија. Истото се случи и во Камбоџа, кога тамошниот бизнис со казина растеше меѓу 2014 и 2019 година.

За среќа на овие казина, не сите од нив зависат од Кинезите. На пример, многу казина од Камбоџа и на Филипините имаат двојно повеќе домашни зависници отколку кинески. Но, не може да се каже дека Кинезите не се во голем број присутни во овие казина, бидејќи тие имаат најдено друг начин да се коцкаат, а тоа преку интернетот. Некои казина на Филипините и Камбоџа имаат можност луѓето од било каде да се коцкаат онлајн на нивните платформи.

Ова е проблематика за која Пекинг дополнително треба да се запраша, доколку навистина сака да го згасне коцкањето кај Кинезите.

Поради ковид-мерките, на Кинезите не им е дозволено да патуваат каде сакаат, но прашањето кое ги интересира соседите е што ќе се случи кога тие мерки конечно ќе бидат укинати.

Интересно за Камбоџа е што во 2019 одлучи да престане да дава лиценци за нови онлајн казина, што беше поздравено од кинеските власти. Овој септември, на Филипините, каде што бумот на коцкањето генерира мали даночни приходи и многу криминал, соопштија дека ќе затворат 175 компании за е-коцкање и ќе депортираат 40.000 кинески работници вклучени во нив. Според официјални податоци, над 200 илјади кинески работници работат во овие вакви центри на Филипините, каде коцкањето стана легално во 2016 година.

Големиот бран на кинески коцкари кои како туристи оставаат големи суми пари таму е интересна проблематика која Пекинг внимателно ја следи.