Кина официјално објави дека „значително ќе го намали“ бројот на американски филмови што ги увезува поради ескалацијата на трговската војна на Доналд Трамп.

Американскиот претседател минатата недела рече дека ги зголемува царините за увоз од Кина на 125 отсто, откако азиската земја покажа, како што рече, „недостаток на почит“ на глобалните пазари.

Сепак, дури и пред последниот напад на Трамп врз кинескиот увоз, кинеската Национална филмска администрација наводно размислувала за целосна забрана на сите холивудски филмови како одмазда за екстремните царини наметнати од американскиот претседател.

Во официјалното кинеско соопштение за ова прашање се наведува дека „погрешниот потег на американската влада за злоупотреба на царините во Кина неизбежно дополнително ќе ја намали желбата на домашната публика кон американските филмови“. „Ќе ги следиме правилата на пазарот, ќе го почитуваме изборот на јавноста и умерено ќе го намалиме бројот на увезени американски филмови“.

„Кина е вториот најголем филмски пазар во светот. Отсекогаш одржувавме високо ниво на отвореност кон надворешниот свет и ќе претставиме повеќе одлични филмови од целиот свет за да ја задоволиме побарувачката на пазарот“, се забележува во соопштението.

На прес-конференција Трамп беше прашан за неговата реакција на одлуката на Кина.

„Сум слушнал полоши работи“, рече тој смеејќи се.

Американските филмови значително опаднаа по популарност во последните години во Кина, според „Холивуд Репортер“, но се уште има неколку филмски проекти кои биле успешни во земјата.

Во 2022 година, високоочекуваното продолжение на „Аватар“ на Џејмс Камерон, „Патот на водата“, заработи значителни 246 милиони долари на кинескиот бокс офис, додека новиот филм за „Мајнкрафт“ дебитираше со 14,7 милиони долари во првиот викенд во кината.