Рјуичи Кимура, осомничен дека фрли чадна бомба врз јапонскиот премиер Фуми Кишида, има активна тужба против Владата во која тврди дека неправедно му е забрането да се кандидира на националните избори, јавија денеска јапонските медиуми.

Кимура во јуни минатата година поднел тужба до Окружниот суд во Кобе, тврдејќи дека не можел да се кандидира на изборите поради возраста и неможноста да го уплати депозитот од три милиони јени (22.339 долари), објави дневниот весник „Јомиури“ и други медиуми.

Според записникот, 24-годишниот Кимура тврди дека изборниот закон го прекршува Уставот, кој меѓу другите одредби предвидува еднаквост пред законот.

Судот ја отфрлил тужбата, во која Кимура барал отштета од 100.000 јени за душевна болка што наводно му е нанесена, се вели во извештаите.

Против оваа пресуда Кимура се жалел до Високиот суд во Осака, тврдејќи дека актуелните политички сили незаконски останале на власт, а одлуката за тоа ќе биде донесена следниот месец, објавија јапонските медиуми.

Јапонските власти завчера упаднаа во домот на Кимура во Каваниши, во префектурата Хјого, еден ден откако тој беше уапсен на местото на настанот кога се обиде да го нападне Кишида со експлозивна направа за време на изборниот говор на премиерот во градот Вакаиама.

ВИДЕО: Нова снимка ја покажува реакцијата на телохранителот при обидот за атентат на јапонскиот премиер

Кимура допрва треба официјално да биде обвинет за инцидентот.

За да ја зголемат безбедноста по инцидентот, Владата на Кишида и владејачката Либерално-демократска партија одлучија да ги преместат предизборните говори на високи функционери во затворени простории и да ги прегледаат личните предмети до изборите во недела, објави „Џиџи њуз“.

Инцидентот покрена алармантни прашања за состојбата со ВИП безбедноста во Јапонија, помалку од една година откако беше убиен поранешниот премиер Шинзо Абе и еден месец пред Јапонија да биде домаќин на лидерите на Групата седум

ВИДЕО: Фрлена бомба врз јапонскиот премиер, телохранителите го заштитија со своите тела