Левиот бек Милош Керкез и официјално е нов фудбалер на англискиот шампион Ливерпул. Унгарскиот репрезентативец денеска успешно ги мина медицинските прегледи и потпиша долгорочен договор со „црвените“.

Керкез е најновото засилување за Ливерпул ова лето, а неговиот трансфер следи само неколку дена по доаѓањето на германскиот бисер Флоријан Вирц, кој беше промовиран минатиот петок. Во своето прво интервју за официјалниот клупски сајт, 21-годишниот дефанзивец не го криеше задоволството од трансферот.

„Навистина сум среќен. Чест е и привилегија да се дојде во еден од најголемите клубови на светот, најголемиот клуб во Англија. Пресреќен сум и возбуден. Ќе се вратам дома за неколку дена да одморам, а потоа едвај чекам да започнам со подготовките за новата сезона“, изјави Керкез.

Унгарецот доаѓа на „Енфилд“ по две успешни сезони во дресот на Борнмут, каде настапи на 74 натпревари, постигна два гола и запиша осум асистенции.

Керкез ја започна својата професионална кариера во унгарскиот ЕТО Ѓер, а во 2021 година се пресели во италијанскиот гигант Милан каде што беше дел од младинските категории. Подоцна премина во холандски АЗ Алкмар, каде одигра 57 натпревари пред да пристигне во Бормут каде што брзо стана еден од најважните во тимот.

На репрезентативен план, досега има 23 настапи за сениорскиот тим на Унгарија, а дебитираше во септември 2022 година против Германија во натпревар од Лигата на нации на УЕФА.

We have completed the signing of Milos Kerkez from AFC Bournemouth 🔴

— Liverpool FC (@LFC) June 26, 2025

Ливерпул го комплетираше еден од најголемите трансфери ова лето