Првиот рапер добитник на Пулицерова награда, Кендрик Ламар, ќе настапи на полувремето на Суперболот во 2025 година, објавија во неделата Националната фудбалска лига и „Епл мјузик“.

Ова ќе биде вторпат повеќекратниот добитник на наградата Греми да настапува на еден од најпосакуваните музички настани, но ќе биде и првпат тој да биде главен изведувач, пишува Би-би-си.

„Рап музиката сè уште е највлијателниот жанр до ден-денес. И јас ќе бидам таму за да го потсетам светот зошто е тоа така. Тие ја имаат вистинската личност за тоа“, изјавил Ламар.

Суперболот ќе се одржи на 9 февруари во Њу Орлеанс во „Цезарс Супердом“, а ќе се емитува на Фокс. Ќе биде продуциран од раперот Џеј Зи, кој ги продуцираше и последните пет изведби на Супербол.

Ламар веќе има настапувано на овој настан, но не како соло изведувач, туку како дел од настапот на Др. Дре во 2022 година. Тогаш, сцената на Супербол ја делеа Дре, Снуп Дог, 50 Сент, Мери Џеј Блајџ, Кендрик и Еминем.

Роден е во Комптон и познат како еден од најинвентивните текстописци во жанрот на хип-хоп. Во 2018 година, тој стана првиот хип-хоп изведувач кој ја добил Пулицеровата награда за музика.

„Кендрик одново ја докажува својата уникатна способност да создава посебни моменти кои ги редефинираат и на крајот ги разнишуваат самите основи на хип-хопот“, рекол шефот на музика во НФЛ, Сет Дудовски.

Инаку, досега на овој спортски настан настапувале уметници како Ријана, Ашер, Бијонсе, Ролинг Стоунс и Брус Спрингстин. Суперболот е најголемиот спортски настан во САД. Привлекува десетици милиони гледачи и се емитува низ целиот свет.