Културниот и едукативен центар „Небрегово“ веќе традиционално на 6 септември во Спомен-домот „Блаже Конески“ во Небрегово го промовира зборникот „Конески е бесмртен“ и ја доделува наградата „Зборот на Конески“.

КЕЦ „Небрегово“, во рамките на Програмата за работа, оваа година распиша Конкурс на тема „80 години азбука и правопис на македонскиот стандарден јазик“. Пристигнатите текстови се објавени во зборникот „Конески е бесмртен“, чија промоција веќе традиционално се одржува на 6 септември во Спомен-домот „Блаже Конески“ во Небрегово.

На промоцијата присуствуваат членови на Управниот одбор на КЕЦ „Небрегово“, рецензенти на најновото издание, како и учесници на конкурсот и добитници на наградите.

– За Блаже Конески, Горан Стефановски напишал: „Те имавме како единица мерка на животот, сега си ни мерка за бесмртноста“. Таа аксиома е непобитен извор дека Конески е бесмртен, што е и основен мотив содржан во насловот на 17-та книга „Конески е бесмртен“ во издание на КЕЦ „Небрегово“. Ова е уште една непобитна вистина дека спомен-домот „Блаже Конески“ во неговото родно место Небрегово станува култно и едукативно место за нашата национална култура. Затоа ја истакнуваме суштинската потреба за редовни, програмирани и организирани посети на домашни и странски делегации на ученици, студенти и наставници за непосредно и изворно запознавање со ликот и делото на Блаже Конески, со што овие манифестации стануваат трајно обележје во културата на нашата држава – истакна Атанас Конески, секретар на УО на КЕЦ „Небрегово“.

Зборувајќи за подготовките и издавањето на книгата „Конески е бесмртен“, тој додаде: „Блаже Конески колку повеќе се оддалечува со неговото физичко заминување, толку повеќе ни се приближува со неговата духовна големина, со неговото епохално дело. Затоа Блаже Конески е бесмртен, а славата на бесмртните е бесконечна, ним треба секогаш да им се оддолжуваме“.

Фондацијата, односно КЕЦ „Небрегово“ во изминативе 23 години посебно тежиште даде на издавачката дејност, промотивните настани на нејзините изданија и развојот на културниот туризам. Во едицијата „Македонски збор“ досега се издадени седум книги, во кои се застапени 249 автори на 1.750 страници. Во едицијата „Поттикот Конески“ се издадени десет книги во кои се објавени осум тематски изданија и два зборника со поетски творби од ученици, студенти и професори, во кои се застапени 344 автори на 650 страници.

– Ова се податоци за восхит и почит и се потврда дека „Зборот на Конески“ има оддек во иднината. Затоа бараме поголема конкретна поддршка од Владата на РСМ, Министерството за култура и туризам, Министерството за образование и наука и од локалната самоуправа во општините Прилеп и Долнени, а не само да се цитира Блаже Конески во одредени пригоди и погоди – нагласи Конески.

Рецензенти на најновото издание на зборникот „Конески е бесмртен“ се Маја Јакимовска-Тошиќ и Весна Костовска. Со одлука на УО на КЕЦ „Небрегово“ наградите оваа година ги добија учениците Мелани Ѓорѓеска, Анисија Наумоска, Елдина Шемоска, Кјара Лазаревска, Сара Јованов, Даница Левкова, како и Весна Мојсова-Чепишевска и Иван Антоновски од Филолошкиот факултет „Блаже Конески“ – Скопје, Лилјана Неделкоска од НУ Завод и музеј – Прилеп, публицистот Елизабета Митреска, писателот Тони Павлески и уредникот во АД „Култура“ – Скопје, Гордана Војнеска. Наградите им ги врачи Живко Цветковски, претседател на УО на КЕЦ „Небрегово“.

На настанот во Небрегово беше актуализирано прашањето за државната награда „Блаже Конески“, која помина низ собраниска процедура, беше ставена на дневен ред, но таа точка не го дочека гласањето од претходниот собраниски состав.

КЕЦ „Небрегово“ во соработка со Фестивалот на народни инструменти и песни „Пеце Атанасовски“ од Долнени-Прилеп на 7 септември во Спомен-домот „Блаже Конески“ во Небрегово го организираат културно-туристичкиот настан „Зборот на Конески, гајдата на Пеце“.

(Текстот е објавен во „Културен печат“ број 246, во печатеното издание на весникот „Слободен печат“ на 07-09.09.2024)