Продукцијата „Авалон“ најави дека магичната Дина Јашари ќе го отвори концертот на „Масив атак“, како прв концерт од годинашното издание на музичкиот фестивал „Скопје колинг“ на 28 јуни на Стадион на АРМ.

– На прашањето кој би требало да го отвори концертот на еден од најмагичните глобални бендови на сите времиња, изборот тоа да биде домашниот артист со најмагичен глас беше очигледен и едногласен. Нашата желба е очигледна – најдоброто од Македонија да се спои со најдоброто од светот. Претставник, а некои би кажале и лидер на новиот македонски музички бран, добитник на регионалната награда „Милан Младеновиќ“ во 2022 година, харизматичната кантавторка и продуцентка Дина Јашари цврсто го зазеде своето место под регионалното музичко небо и сосема заслужено ќе настапи пред „Масив атак“ – велат од „Авалон“.

Фестивалот „Скопје колинг“ ќе почне на 28 јуни со концертен спектакл кој ќе донесе целовечерна музичка магија на Стадионот на АРМ во Скопје.

Фестивалската програма на „Скопје колинг“ содржи концерти на суперкултните „Масив атак“ со својата аудиовизуелна магија, кои ќе настапат на 28 јуни, свежиот и неприкосновен рокенрол глас на новата генерација на „Џокер аут“ ќе прозвучи на 29 јуни, додека на 22 август ќе се одржи долгоочекуваниот настап на Ник Кејв со својата мистична длабочина.

– Три вечери, три светски имиња, една незаборавна музичка приказна за сите генерации ќе се случи на Стадион на АРМ – потенцираат од „Авалон“.