Словенечкиот „Институт Данес“ започна нова кампања со која сакаат да привлечат внимание на тешките услови на пазарот за изнајмување, кои се влошени од платформите за краткорочно изнајмување. Според нивните информации, во последните три години тројно е зголемен бројот на станови кои се издаваат преку платформата Арбиенби, објави Н1.

„Како општество, би можеле да се согласиме дека примарната функција на станот е дом, а не капитал што се рафинира или хотелска соба што се издава на туристи“, вели Тадеј Штрок од Институтот.

Краткорочното изнајмување станови преку платформи ја влоши ситуацијата на пазарот за изнајмување во последната деценија. Во март, Европската унија одобри нови правила за оваа намена, кои бараат платформите за посредување во краткорочните изнајмувања на недвижности редовно да пренесуваат податоци до локалните власти. Со регулативата сакаат да ја зголемат транспарентноста на полето на краткотрајното издавање, а пред сè да ги унифицираат условите за краткорочно издавање.

Во исто време, Министерството за економија, туризам и спорт подготвува нов закон за угостителство, со кој, според последните информации, краткорочното изнајмување би се ограничило на максимум 30 дена во годината. Но, оваа одредба нема да биде обврзувачка. Општините би можеле да го приспособат по сопствена дискреција.

Дека состојбата на пазарот за изнајмување е тесна сведочи државниот секретар во Министерството за економија, Матевж Франгеж, кој пред две недели рече дека лани имало пет пати повеќе огласи за краткотрајно издавање на недвижности отколку во 2015 година.