Една постара калуѓерка во Америка е осудена на една година затвор поради проневера на пари од училиштето во кое работела како директорка. Имено, таа се извинила за своите постапки и ја прифатила казната, пренесува „NY Post“.

Калуѓерката Мери Маргарет Кројпер од Лос Анџелес, оваа недела беше осудена на една година затвор за проневера на училишни пари.

80-годишната дама меѓу 2008 и 2018 година „извлекла“ околу 900.000 долари од католичкото училиште во кое работела како директорка, кои потоа ги потрошила како што сакала.

А најмногу од сè, според сите сметки, сакала да се коцка. Откриено е дека таа често го посетувала Лас Вегас, но и други помалку познати дестинации за коцкање.

„Немам оправдување за моите постапки. Згрешив и го прекршив законот“, изјавила таа на суд.

Обвинителот Пунам Кумар откри повеќе детали

„Кога беше фатена, првото нешто што ни кажа е дека го направила тоа затоа што смета дека не е фер свештениците да се подобро платени од калуѓерките. Иако годишната школарина е 6.000 долари, г-ѓа Кројпер често барала донации од родителите за подобрување на условите во училиштето. Но, овие средства никогаш не биле искористени за истите цели“, тврди обвинителот.

„Родителите го избрале ова училиште за своите деца поради католичките вредности и сега се чувствуваат измамени. Некои родители велат дека овој случај им ги оддалечил децата од црквата и од Бога“, изјави Кумар.

Меѓутоа, имало и родители кои барале да ѝ се прости на Мери.

„Жената работи во образовниот систем 58 години. Таа е директорка на ова училиште во последните 28 години. Не велиме дека е добро тоа што го направила, но бараме судот да има предвид се што направила за заедницата во последните децении“, стои во дописот што неколку родители го потпишале и го испратиле до судот.

Иако обвинителството бараше две години затвор, судот сепак одлучи да ја „преполови“ казната. Сестра Кројпер мора да се јави на отслужување на казната на почетокот на јули.