Македонскиот тенисер Калин Ивановски во израмнет и маратонски меч успеа да го совлада шестиот носител Вјачеслав Биелински од Украина во второто коло на ИТФ фјучрсот во Опатија, Хрватска, што се игра за награден фонд од 15.000 долари. Ивановски победи со 2:1 во сетови 7:6 (3), 5:7, 7:6 (4) за три часа и пет минути игра.

Во првиот сет се водеше голема борба за секој поен, а тенисерите го освојуваа гемот на сопствен сервис. Во 13 гем во тај брејкот под 1:0 на поени за Биелински, Ивановски направи серија од четири поени за предност од 4:1 и гемот го заврши со 7:3 на поени за водство од 1:0 во сетови.

Во вториот сет израмнето беше до 5:5 во гемови кога противникот на Ивановски успеа да направи брејк и сетот потоа го доби со 7:5 во гемови за 1:1 во сетови.

Во решавачкиот сет повторно неизвесност до 3:3 во гемови. Но, по направениот брејк украинскиот тенисер дојде до предност од 5:3 во гемови. Ивановски најави пресврт го доби деветиот гем во сетот за да намали на 5:4 во гемови. Во 10 гем Биелински беше на две топки до победа на свој сервис, но македонскиот тенисер не го дозволи тоа и успеа од единствената брејк шанса да напарви брејк и да израмни на 5:5 во гемови. По 6:6 во гемови следуваше уште еден тај брејк. Ивановски повторно почна одлично и поведе со 4:0 на поени и предноста ја зачува до крајот добивајќи го сетот со 7:4 на поени.

Ова е петта победа за Ивановски на овој турнир (три во квалификациите) и утре во четвртфиналето Македонецот ќе игра против вториот носител на турнирот Зденек Колар од Чешка (28 години, 399 место АТП).