Идејата за Европска Македонија која ја предводи СДСМ и коалицијата ќе победи, порача пратеничката Снежана Калеска Ванчева од СДСМ, во синоќешната емисија „24 Анализа“ на ТВ24.

Во дебатата со пратеникот на ВМРО-ДПМНЕ, Антонио Милошоски кој кажа дека за блокадата од Бугарија неговата партија ќе понуди европски модел по примерот на Словенија и Хрватска, Калеска Ванчева праша:

– Зарем тоа е иднината која ја нуди ВМРО-ДПМНЕ? Со помош на ЕУ, со помош на САД, тогаш ќе се обидеме со нешто ново и нова преговарачка рамка. Дали сметате дека до оваа рамка се стигна без ЕУ и САД, знаете дека не е така. Доаѓаат пораки од ЕУ кои велат дека нема друга преговарачка рамка.

Таа се наврати и на изјавата на претседателот на ВМРО-ДПМНЕ, Христијан Мицкоски дека ако е потребно и 100 години ќе чекаме за влез во ЕУ. Во врска со договорот со Бугарија таа посочи дека никој не вели дека сите отворени прашања кои историски ги имаме со Бугарија ќе се избришат веднаш со гума и нема да постојат, но со самото отворање на поглавјата, чекор по чекор, позицијата ќе биде сосема поинаква, а за наративите на некои бугарски политичари рече дека се тоа нивни наративи.

Што се однесува до разговорите на политичките партии за соработка за изборите, вклучително и онаа на претседателот на СДСМ Димитар Ковачевски со Арбен таравари од Алијанса за Албанците, таа изјави дека СДСМ соработува со сите политички партии кои се за европска иднина на нашата држава.

– Сосема очекувано и нормално е Ковачевски да се среќава со лидери на други политички партии ако се има допирни точки. Ваквата средба не е и не претставува ништо невообичаено. Дали значи тоа заеднички листи и коалиции, беше кажано и претходно, сѐ уште е рано, течат разговори, преговори, тоа е одлука која ке ја донесе највисокиот орган на партијата, рече Калеска Ванчева.

Милошоски: За блокадата од Бугарија, можеме да понудиме европски модел, по примерот на Словенија и Хрватска