Греењето во становите во текот на зимата го суши воздухот, а тоа лошо влијае на собните растенија. Толку многу саксии остануваат празни дури и пред пролетта, иако мислите дека правите сè како што треба. Професионалните цвеќари истакнуваат дека најчесто грешиме при изборот на локација за внатрешни растенија и нивното претерано полевање.

Избор на место

Собните растенија не треба да се чуваат премногу далеку од прозорец, но не и премногу блиску до радијатор. Во зима деновите се пократки и има помалку светлина. Поставете ги растенијата во близина на прозорец каде што ќе добијат оптимална количина на светлина. Колку поблиску до прозорецот, толку подобро.

Од друга страна, избегнувајте да ги поставувате растенијата во близина на извори на топлина како што се радијатори или греалки бидејќи тоа може да предизвика почвата да се исуши и да ги оштети растенијата.

Температура

Идеалната собна температура треба да биде помеѓу 15 и 20 степени, па едно решение е да чувате неколку саксии на заедничка полица, барем додека трае зимата, е еден од советите.

Намалете го наводнувањето

Во зима, поретко додавајте хранливи материи, но редовно отстранувајте ги сувите лисја и изнемоштените ластари за растението слободно да расте. Повеќето собни растенија не треба често да се наводнуваат во зима, бидејќи, како што истакнуваат цвеќарите, растенијата подобро поднесуваат сува почва отколку да се натопени во вода.

Од друга страна, растенијата кои цветаат во зимските месеци треба да продолжат да се полеваат на секои два до три дена, а листовите да се бришат со влажна крпа.

Одржувајте ја влажноста

Централното греење може да доведе до сув воздух, што може да биде штетно за вашите растенија. Зголемете ја влажноста околу растенијата со прскање вода околу листовите или ставање садови со вода во близина на растенијата за испарување.