Страшниот, но вистинит факт е дека не мора да имате секс за да добиете сексуално преносливи болести. Гинекологот Алиса Двек од Њујорк е авторка на книгата „В е за Вагина“ (V is for Vagina). Таа откри каде се кријат вирусите од кои треба да бегаме.

Во пределот на меѓуножјето има многу различни микроорганизми и бактери. Сите тие бактерии создаваат меѓусебна рамнотежа, ја одржуваат и едни на други спречуваат некои од овие видови премногу да не се размножат. И покрај тоа, понекогаш работите тргнуваат во погрешна насока, а последица на тоа се инфекциите на половиот орган, на пример, со микроорганизми, кои во анусот не се штетни, а во вагината можат да предизвикаат многу непријатности доколку случајно се најдат таму. Инфекциите од тој тип можат да се појават кај жените кои се сексуално активни, но и кај оние кои не се. Вагиналните и инфекциите на уринарните патишта спаѓаат меѓу најзачестените гинеколошки проблеми.

Бактериска вагиноза

Станува збор за вагинална инфекција кај сексуално активните жени. Не се пренесува исклучиво по пат на сексуален однос, туку ја предизвикуваат сексуални активности кои предизвикуваат нарушување на бактериската рамнотежа во вагината. Кај бактериската вагиноза се појавува сив или бел исцедок со непријатен мирис, речиси сличен на мирис на риба, а појавата може да биде проследена со иритација на вагината. Бактериската вагиноза се лекува со земање или нанесување антибиотик во вагината во облик на крем или гел.

Цистит

Циститот е воспаление на меурот. Причина за негова појава е бактериската инфекција, а се појавува кај жените во сите возрасни групи и е исклучително непријатен. Главен симптом е зачестената потреба за уринирање, при што доаѓа само до излачување на неколку капки урина проследено со пецкање.

Воспалението во самиот меур оневозможува потполно празнење, а присутните бактерии во заостанатата урина можат и понатаму да се размножуваат. Тие бактерии се наметници, бидејќи во меурот и уретрата обично нема микроорганизми. Од внатрешниот дел на уретрата, кад случајно се нашле, бактериите влегуваат во меурот. Женската уретра е многу пократка од машката, па затоа и циститот е многу почест кај жените, а сексуалниот однос може да припомогне во неговото ширење по уретрата. Воспалението на меурот често престанува само од себе, но ако подолго трае, потребно е лекување со антибиотици и со увин или чај од брусница. Доколку инфекцијата остане неизлекувана, може да се прошири и на бубрезите. На жените кои се склони на цистит им помага доколку и пред и по сексуалниот однос го испразнат меурот, бидејќи така ги бркаат потенцијалните бактерии.

ХПВ и кондиломи

Иако со години се зборува и се откриваат нови детали за ХПВ-вирусот, многумина не знаат дека може да се пренесе преку кожата. ХПВ-вирусот може да се пренесе преку кожата, но само ако некој ја допре брадавицата (кондилом) која настанала како последица од овој вирус. ХПВ-вирусот доаѓа во различни облици, а некои може да предизвикаат генитални брадавици.

– Брадавиците понекогаш се појавуваат и на други места, како на пример, на прстите. Иако брадавиците може да се отстранат, вирусот и понатаму може да остане во организмот и повремено да се активира – вели д-р Алиса Двек.

Молускум контагиосум (Molluscum Contagiosum)

Иако звучи нереално, заразната вирусна инфекција често се пренесува преку солариумите кои жените често ги посетуваат. Првите симптоми по кои ќе ја препознаете оваа инфекција се тврдите топчиња на гениталиите, но тие може да се прошират заради што треба да се загрижите. Позитивната страна е што кога еднаш ќе се ослободите од вирусот, инфекцијата обично не се враќа.

Трихомонијаза

Оваа болест не е многу позната, но вреди да се прочита нешто и за неа, бидејќи вирусот може да преживее на нежив предмет доста долго откако ќе го допре заразено лице. Може да се појави во форма на вагинална инфекција, со исцедок, секрет со непријатен мирис, придружен со чешање и иритација.

– Може да се пренесе преку работи како валкани крпи или неизмиен вибратор – вели Двек.

Таа е сексуално пренослива болест, симптомите се карактеризираат со чешање, зеленкаст, густ и смрдлив исцедок, често доведува и до воспаление на бешиката и симптоми на акутен цистит.

Иако нема точни информации за тоа колку долго може да преживее вирусот, лекарката објаснува дека е малку веројатно дека ќе се заразите со допирање на некој предмет неколку недели откако го допирало лице со трихомонијаза. За среќа, лесно може да се излекува со антибиотици.

Кандидијаза или габички

Кандидијазата е габична инфекција на вагината, а се појавува кај жените на сите возрасти без оглед на сексуалната активност. Ја предизикува габичката candida albicans, која е присутна во вагината, анусот, устата, на вулвата и на кожата. Кога прекумерно ќе се размножи, што инаку по правило ја контролираат и спречуваат останатите бактерии и организми, предизвикува одредени симптоми.  Главен меѓу нив и белиот и густ исцедок и иритацијата и чешањето на вагината. Може да предизвика и пецкање во вагината за време на сексуалниот однос. Често поволни услови за размножување на габичката се создаваат поради земање некои антибиотици, некои видови контрацептивни таблети и поради бременоста. Кандидијаза може да предизвика и стресот, како и лекови кои им се даваат на болните од сида или дијабетес.

Понекогаш кај мажите по сексуалниот однос со инфицирана партнерка може да се појави воспаление на главата на пенисот.

Кандидијазата се лекува со соодветна терапија, вагинални супозитории или со вагинални кремови. Лекарот може да препише лек и на партнерот на жената поради превенција од повторна инфекција.

Херпес

Ова е првата инфекција на која помислуваат луѓето кога ќе се спомнат венерични болести. Затоа е мошне алармантно да се открие дека херпес симплекс може да се пренесе на некои мошне невини начини.

– Од херпес може да се заразите со бакнување, споделување валкан брич, па дури и од неизмиени чаши и садови, иако во овој случај ризикот е доста низок – тврди д-р Двек.

Иако постојат два типа на херпес, HSV-1 и HSV-2, гинеколозите не прават голема разлика меѓу нив. HSV-1 порано се сметаше за орален тип, а HSV-2 за генитален тип, но денес таа разлика е помалку важна отколку што беше порано.

– Освен  фактот што типот 1 обично не се враќа, додека типот 2 има тенденција да се повторува, и двата типа можат да се појават каде било на телото. Иако херпесот може да помине без симптоми, раната околу устата е сигурен знак за оваа вирусна инфекција. Секоја раничка на гениталниот орган не е причина за сомнеж, но подобро е да се внимава – забележува докторката и додава дека се лекуваат само симптомите, но не и причината.