Мирисот на цимет, ѓумбир и каранфилче со години е симбол на есента. Пампкин пај спајс (во превод: зачин за пита со тиква), зачинската мешавина позната најмногу по популарниот напиток пампкин спајс латe, крие многу повеќе од тренд на социјалните мрежи, пишува „Живим“.

Станува збор за комбинација на зачини што со векови се користат во фитотерапијата – медицинска дисциплина што ги употребува лековитите растенија и нивните активни состојки за зачувување на здравјето и лекување болести. Дознајте како сами да ја подготвите оваа ароматична мешавина и притоа да ја искористите нејзината природна моќ.

Цимет

Циметот е еден од најпознатите есенски зачини и се користи во фитотерапијата со векови. Богат е со антиоксиданси кои ги штитат клетките од оштетување предизвикано од слободните радикали, помага во регулирање на шеќерот во крвта и го поддржува здравјето на срцето и крвните садови. Неговата топла арома создава чувство на удобност и смиреност, што го прави идеален за студените денови.

Ѓумбир

Ѓумбирот е вистински есенски „грејач“ и природен сојузник во борбата против настинка, грип и дигестивни проблеми. Познат е по своите противвоспалителни својства што ги намалуваат симптомите на болести и го поддржуваат имунолошкиот систем. Во комбинација со цимет и каранфилче е незаменлив дел од есенската и зимската исхрана за одржување на здравје и виталност.

Каранфилче

Каранфилчето е моќен антисептик и природен аналгетик. Традиционално се користело за забоболка и воспалено грло, а денес е ценето поради антибактериските и антиоксидативните својства. Освен што ја збогатува аромата на мешавината, го зајакнува и имунитетот на организмот.

Мускатно оревче

Мускатното оревче има топла, благо слаткаста и ореваста арома и се користи во мали количини поради силниот вкус. Традиционално се додава во јадења за подобрување на варењето и поттикнување апетит. Познато е и по благото смирувачко дејство врз нервниот систем. И во кулинарството и во фитотерапијата важи правилото на умереност – премногу количина може да биде токсична, но малку носи карактеристична арома и чувство на „comfort“.

Пимент

Пиментот ги спојува вкусот на цимет, бибер, каранфилче и мускатно оревче. Освен што дава богатство на вкус, помага при варење и намалување на надуеност. На мешавината со пампкин пај спајс (во превод: зачин за пита со тиква) ѝ додава длабочина и ја прави уште полековита.

Како да направите свој пампкин пај спајс дома?

Потребни состојки

• 3 лажици мелен цимет
• 2 лажички мелен ѓумбир
• 1 1/2 лажичка меленo мускатно оревче
• 1 лажичка меленo каранфилче
• 1 лажичка мелен пимент (по желба)

Подготовка

Измешајте ги сите зачини и чувајте ги во стаклена тегла со капаче. Ако немате пимент, рецептот ќе биде исто толку вкусен и без него. Мешавината може да стои со месеци, а секоја лажичка ќе биде вистинска есенска доза топлина и лековити својства.

Како да користите пампкин пај спајс во секојдневието?

• Пампкин пај спајс латe – додајте прстофат во меленото кафе или топло млеко
• Овесни снегулки – посипете врз доручек со јаболка или банана
• Смути – комбинирајте со тиква, банана и грчки јогурт
• Печена тиква или сладок компир – зачинете пред печење за побогат вкус
• Колачи и бисквити – додадете во пандишпан или лепче од банана

Есента е време кога природата се забавува и нè повикува и ние да го пронајдеме својот ритам. Пампкин пај спајс е мал потсетник дека и во зачините можеме да најдеме топлина, поддршка за здравјето и моменти на уживање. Кога сами ќе ја подготвиме оваа ароматична мешавина, во домот внесуваме мирис на традиција и моќ на растенија што со векови го зајакнуваат телото и умот. Оваа есен одвојте момент за шолја напиток со пампкин пај спајс и дозволете да ве потсети колку и малите навики можат да донесат радост и виталност.