Уставниот судија Осман Кадриу нема намера да поднесе оставка откако премиерот Христијан Мицкоски побара тој да ја напушти функцијата зашто не му било таму местото. Кадриу во изјава за „Слободен печат“ вели дека не коментира политички изјави, но потврди дека нема да поднесе оставка.
По бојкотот на седницата на Уставниот суд на која почна расправата за уставноста на Законот за употреба на јазиците, Кадриу остава можност да учествува на подготвителната седница за Законот, која треба да се одржи во март следната година.

На седницата на Уставниот суд за Законот за јазиците, освен Кадриу не присуствуваше ни вториот судија Албанец Насер Ајдари, додека судијата Турчин ја напушти просторијата откако не му помина барањето расправата да се одложи.

– Политичка изјава нема да коментирам. Оставка не поднесувам – ни изјави Кадриу и додаде дека не е одлучено дали ќе учествува на подготвителната седница иако навести можно присуство.

Мицкоски претходно побара Кадриу итно да замине од Судот поради изјавата на судијата дека „одложувањето на одлуката за Законот за употреба на јазиците е во корист на каузата на албанските судии и на Албанците воопшто“.

– Кога дојдоа забелешките од Венециската комисија, јас не ги фатив за врат членовите од претходната влада на СДСМ и ДУИ, кои велеа дека забелешките ќе ги имплементираат. Што не ги имплементираа? Јас не ги фатив за врат да кажат ако Уставниот суд ги прогласи за неуставни, ќе ги смениме. Јас не ги избирав уставните судии. Тие си ги избираа, со должна почит кон луѓето од таа професија, но дел од нив не ги оправдале очекувањата на граѓаните од таа професија. Не, не, никој не го направил тоа, но истовремено да каже уставен судија тоа што го кажа, поврзано со албанската кауза и слично, него не му е таму местото, простете, но не му е таму местото. Тој може такви изјави да кажува на друго место, треба под итно да поднесе оставка зашто тој зема од мене плата. Не е чесно да играте на чувствата на граѓаните – рече Мицкоски во гостување на ТВ21.

Кадриу, пак, во интервју за телевизијата Алсат рече дека периодот до подготвителна седница треба да се искористи за да се интервенира во Законот за употреба на јазиците.

– Дотогаш албанскиот политички субјект во Владата и во Собранието има време, а јас дадов и конкретни предлози за да се интервенира во Законот, бидејќи закон како закон има одредени недоследности и нејаснотии – вели Кадриу.

Ни уставниот судија, ни од Коалицијата Вреди не откриваат дали имале средба, кои се насоките што владејачката партија ги добила од Кадриу, ниту пак дали во периодот до подготвителната седница Вреди ќе предложи измени на Законот за употреба на јазиците.

Како што веќе информираше претседателот на Уставниот суд Дарко Костадиновски на 24 месецов, Судот треба да одржи работен состанок на кој ќе се утврдуваат спорните прашања како и предлог листата на кандидати за подготвителната седница. На подготвителната седница освен подносителите на иницијативите за уставноста на Законот за јазиците, ќе учествуваат и експерти по уставно право, по човекови права и експерти по меѓународно право.

За одлуката да ја бојкотираат седницата на Судот, Кадриу и Ајдари не може да понесат никаква одговорност, односно Уставот не предвидел никакви санкции за таква ситуација иако уставните судии се должни да учествуваат на седниците. Тие не може да бидат отповикани, односно останува самите да поднесат оставки, но и за тоа немаат намера.

Според уставни експерти, со самиот чин што ја извршуваат највисоката судска функција во државата, се подразбира дека судиите треба да поседуваат висок морал и етика. Извршувањето на функцијата уставен судија е должност, но не може да биде повикан на одговорност. Судиите не смеат етничката припадност да ја ставаат пред судиската зашто такво нешто не постои. Судиите треба да разменуваат правни мислења, односно уставно правни аргументи, без никакви премиси без оглед дали се тоа етнички, расни, социјални…

Според Уставот, „функцијата судија на Уставниот суд е неспојлива со вршење друга јавна функција и професија или со членување во политичка партија. Судиите на Уставниот суд уживаат имунитет. За нивниот имунитет одлучува Уставниот суд. Судиите на Уставниот суд не подложат на обврска во вооружените сили. На судија на Уставниот суд функцијата му престанува ако поднесе оставка. Судијата на Уставниот суд ќе биде разрешен од должноста ако биде осуден за кривично дело на безусловна казна затвор од најмалку шест месеци или кога трајно ќе ја загуби способноста да ја врши својата функција, што го утврдува Уставниот суд“.