Пред два дена Фудбалската федерација на Македонија објави дека Аријан Адеми ќе отпатува за Загреб за да го комплетира клупскиот ангажман во Динамо. ФФМ воедно соопшти дека откако ќе се решат административните прашања околу ангажманот, нашиот репрезентативец повторно ќе се стави на располагање на националниот тим за натпреварите против Италија в сабота во Скопје и три дена подоцна на гости против Малта во квалификациите за ЕП 2024.

Адеми се јави на повикот на селекторот Благоја Милевски и покрај повредата на листот на левата нога, повреда која го ограничи на само пет минути игра на последниот натпревар од првенството во Кина. Милевски се надева дека Адеми ќе биде на располагање за настап против актуелниот европски шампион Италија.

И натаму нема потврда од хрватскиот шампион дека Адеми е нов старо-нов фудбалер на „модрите“. Адеми е веќе во Загреб за да го договори враќањето во Динамо во чии редови настапува уште еден наш репрезентативец, Стефан Ристовски.

На почетокот се чинеше дека преговорите лесно ќе поминат, дека желбата е обострана, но според хрватските медиуми, Кинезите, поточно Пекинг Гуан, досегашниот клуб на Адеми, прават проблеми. Хрватите и Кинезите никако не можат да се согласат околу понудите. Секогаш кога луѓето на Динамо ќе се договорат, секогаш нешто се одложува или измислува на спротивната страна.

Воедно проблем е и комуникацијата бидејќи Кинезите по неколку часа не одговараат на новите предлози и понуди на Динамо, па може да помине половина ден без одговор. Според Хрватите ова е само „тактика“ на Кинезите да извлечат што повеќе пари од Максимир. Секако, Динамо знае колку им вреди капитенот, подготвен е да плати, но од друга страна одговорот е секогаш ист: „Сакаме повеќе“.