Лето – омиленото годишно време ни е во мислите во текот на целата година, бидејќи ја храни нашата душа. Сонце, море, плажа, патувања, посета на магични градови, чисто задоволство…

Во оваа летна приказна не се исклучок ниту нашите јавни личности. Иако ним најчесто летниот период им е исполнет со професионални ангажмани, секако сакаат да најдат слободно време за летен одмор, да се растоварат од обврските, да побегнат од градскиот метеж и вжештените улици.

Дел од нив за „Слободен печат“ открија како го поминуваат летото, кои им се омилените места за летен одмор во Македонија и надвор од нејзините граници и која им е дестинација од соништата.

Игор Џамбазов

Супер зафатен, растрчан од настапи до снимања, промоции, фестивали… Вака изгледаат летата години наназад на миленикот на македонската публика Игор Џамбазов. Тој вели дека поради обврските, класичен одмор немал со години.

– Во мое време викавме: „Нема одмора, док траје обнова“. Со години не одам на одмор, од проста причина што немам одмор. Не се сеќавам кога последен пат сум бил на море, па плажа, па чадори, па лежалки, фактор 50, и така…

Дали имаш професионални ангажмани летово?

– Не да имам. Концерти со бендот, промоција на новиот албум, два филма што веќе ги снимам и уште еден што допрва ќе го почнам…

Како го замислуваш твојот одмор од соништата?

– На Марс. Мислам дека тоа би било единственото место каде што тотално би одморил. Нема фотографирање, нема потпишување, ве нема вас новинарите… одмор за сите пари.

Омилено место во Македонија за бегање од секојдневието?

– Последното такво место што го открив, топло ви го препорачувам. Брвнара Младеновски, село Стрезовце, близу Куманово…

Весна Петрушевска

Професионалец од почеток до крај, нашата актерка Весна Петрушевска ова лето си дозволила одмор што го заслужува заедно со ќерката Мина и со нејзините кучиња. Сепак, времето за одмор знае да го комбинира и со некоја работна обврска, договори за следни проекти и мисловен процес за нивна подготовка.

– Што се однесува до летото, веќе го уживам и овој одмор го имам по 7-8 години, затоа што имав други приоритети, како, на пример, Мина, а и немав многу време. Поставување на „Дајте музика“ четири сезони, работа со актерската школа до јули и потоа снимања. Со Мина закрепнувавме цели 4 години, особено во лето и сега сме среќни, заедно, здрави, прави и си дозволивме еден, така малку подолг одмор, онаков каков можеби секој од нас заслужува… и само чиста мисла пред нас.

Така што мојот совршен одмор е веројатно овој, кучињата и Мина до мене и само еден „зен“. И тука читам многу, работам и мислам, постојано ѕвони телефонот, ми пишуваат пораки… работам, не знам да оставам нешто на страна, сакам сѐ да завршам денес, „вредница“ сум јас и за време на одмор.

Дали имаш професионални ангажмани летово?

– Што се однесува до ангажманите, можам да се пофалам дека во моментов сум ангажирана од два светски бренда „Пандора“ и „Фанта“. Многу сум среќна затоа што конечно и брендовите не бараат празни инфлуенсери, туку ги бараат оние што имаат влијание и општествена одговорност. Ја подготвуваме третата сезона на „Агенда 21“ заедно со Игор Џамбазов.

Во август ќе снимам петта сезона „Дајте музика“, го подготвувам магистерскиот труд по театарска режија, што значи од септември ќе почнам да учам и да работам на претставата „Ричард Трети“, која се надевам ќе биде поставена во МНТ и многу се радувам дека ќе се занимавам со театарска режија иако тоа веќе го правам со децата. Ова е една сосема друга епоха од мојот професионален живот, така што едвај чекам да бидам театарски режисер и на хартија, а со актерската школа секако си продолжувам.

Како го замислуваш твојот одмор од соништата?

– Својот идеален одмор го замислувам со мојата љубов, знаеш… Можеби и сум заслужила да си бидам сама со него, сѐ уште не кажувам кој е (се смее), ама ќе биде. Тоа ми е сон, таков одмор сакам, каде било… Париз, Њујорк, Малдиви… небото е лимит. Навистина многу жестоко работам, се борам, не се одморам и ми треба и тој „филм“ да помине низ мене.

Омилено место во Македонија за бегање од секојдневието?

– Кога се работи за бегство од Скопје во Македонија, секогаш на прво место ми е Крушево, затоа што таму знам да седнам и да си поразговарам со Тоше, а тоа ми е многу важно. Кога си отиде тој, како да си отиде еден дел од мене, и навистина е така.

Крушево ми е еликсир, знам да поседам кај Тоше, да се прошетам во шумичката блиску до него и потоа пак да се вратам. Тоше секоја зима ме викаше да одиме да скијаме во Крушево и секоја година велев: „Има време, не можам сега, имам работа, имам премиера, претстава…“. Криво ми е што не отидов ниту еднаш и што ги пропуштив тие зими кога ме викаше да се дружиме.