Лето – омиленото годишно време ни е во мислите во текот на целата година, бидејќи ја храни нашата душа. Сонце, море, плажа, патувања, посета на магични градови, чисто задоволство…

Во оваа летна приказна не се исклучок ниту нашите јавни личности. Иако ним најчесто летниот период им е исполнет со професионални ангажмани, секако сакаат да најдат слободно време за летен одмор, да се растоварат од обврските, да побегнат од градскиот метеж и вжештените улици.

Дел од нив за „Слободен печат“ открија како го поминуваат летото, кои им се омилените места за летен одмор во Македонија и надвор од нејзините граници и која им е дестинација од соништата.

Дарја Ризова

Една од нашите најдобри и најталентирани млади актерки со посебна харизма, впечатлива насмевка и многу награди, Дарја Ризова ова лето го поминува во чекор со професионалните обврски. Промовирање на новите претстави на нејзиниот матичен театар МНТ на фестивали во регионот и секако слободното време сака да го искористи за убав одмор на море.

– Ова лето одморот ќе ми биде во Грција. Сонце, плажа, книга, тишина и многу морска храна.

Дали имаш професионални ангажмани?

– Што се однесува до ангажманите, тукушто завршија. Имав премиера на претставата „Иванов“- А.П. Чехов во режија на Зоја Бузалковска во МНТ. Потоа следуваше гостување во Италија, во градот Фоџа со претставата „Нема да биде крај на светот“ во режија на Нина Николиќ и турнејата на претставата „Народен непријател“ исто така во режија на Нина Николиќ во Подгорица, Будва, Зеница и Тиват. Поминавме одлично. Сега сум дома и полнам батерии.

Како го замислуваш твојот одмор од соништата?

– Санторини, Грција, погледот од сонишатата.

Омилено место во Македонија за бегање од секојдневието?

– Охрид, Охрид, Охрид!

Лазар Христов

Актер, музичар, уличен уметник и искрен вљубеник во уметноста. Сосема непосреден и неоптеретен од рамките на општеството, Лазар Христов е млад артист, кој веќе е презафатен со професионалните ангажмани и гостувања во регионот. Ова лето сака да го помине забавно со доза смеење, а одморот од соништата му е на плажа со песок и добро друштво.

Како ќе го поминеш летото?

– Не знам дали ќе го поминам, ама планирам. Планирам сите мали временски дупки помеѓу ангажманите да ги пополнам со смеење. Тоа е забава 4 пати поголема од онаа во ангажманите. Дали е Охрид или Преспа или некоја планина не знам, ама ќе фрлам пар викенди некаде со шатор, сигурен сум.

Дали имаш професионални ангажмани?

– Како тоа „дали“? Во моментов сум во Призрен на „Призрен Фест“. Тука сум дојден како дел од програмата на улични перформери и играм 3 маски во 7 дена и плус имав настап како диџеј во офф музичката програма после претставите. Бевме во Бања Лука, а веќе се подготвуваме за „Шпанцирфест“ во Вараждин. Тоа е со „стрит перформингот“, а со театарот почнавме независен авторски проект со моите колеги Ања, Нела, Нина, Филип и Стефан, премиера очекувајте во ноември. И исто така подготвувам уште еден независен проект, во режија на Војо Цветановски.

Како го замислуваш твојот одмор од соништата?

– Бразил – плажа, песок, боса нова, боса нога, фудбал, одбојка со кошаркарки и „серва“ играме „два на два“ – јас и Лука против Роналдињо и Кафу (15:15 – на два разлика).

Омилено место во Македонија за бегање од секојдневието?

– Во с. Црешнево со дивите свињи и маалските Волци и во Раштак, истите – само без дивите свињи.