Јубилејно издание на „Под земја полесно се дише!“ ќе се одржи во гаражите под Плочник
Независното здружение на уметници „Кула“ на 28 декември, од 19 часот, го организира јубилејното 10. издание на настанот „Под земја полесно се дише!“ во гаражите под Плочник, позади Соборната црква во Скопје.
Препорачано
Со мото „Уметноста ги зближува луѓето!“, уметниците ја покануваат публиката во неконвенционален простор да ја проследат ликовната и музичката програма подготвена од „Кула“.
Во музичкиот дел ќе настапат групите „Алембик“, „Намуз“ и „Пондскул“, додека ликовната програма е составена од дела и инсталации на Еџе Али, Јелена Белиќ, Филип Велковски, ΓΑΔΑΚ (Грција), Ангела Георгиевска, Денис Денчиќ, Диме Ѓорѓиевски, Бранкица Јордановска, Симона Манчева, Наташа Неделкова, Амир Карахасан, Миле Неделков, Нора и „Истеривачи публике“, О.П.А, Виктор Петрески, Исмет Рамиќевиќ, Ертунч Сали, Сања Симоска, Aделиса Фазлиоска, „Партизанска штампа“ и студенти од Архитектура.
Организаторите ги покануваат сите градски и приградски луѓе што не се плашат ич од скопскиот студ, бидејќи во независното уметничко воздушно подземје полесно се дише во тазе јаглерод диоксид отколку во ладен скопски смог. Дизајнот на плакатот е на Амир Карахасан.
