Од 2022 година до денес Владата нема донесено одлука за вршење субвенциониран линиски превоз за студенти, а ЈСП самостојно решило да продолжи бесплатно да ги вози студентите. Последната исплата на Министерството за образование и наука кон ЈСП е направена во 2021 година, кога се исплатени два милиони евра. Законот за високо образование вели дека Владата може да донесе одлука за посебни погодности за студентите, како што се студентска картичка за попусти, бесплатен градски превоз и друго, при што средствата се обезбедуваат од државниот Буџет.

Причината за тоа што тогаш не била продолжена оваа одлука е поради пандемијата ковид-19, кога студентите не посетуваа настава со физичко присуство. Иако во соопштението што тогаш го објавило Министерството се наведува дека тие ќе предвидат средства во својот буџет за 2023 година, тоа не било направено.

Ако МОН и ЈСП не склучиле договор во овие три години, зошто градоначалничката Данела Арсовска инсистира да се исплати долг од осум милиони евра?

„Слободен печат“ испрати прашања до ЈСП, но до објавување на текстот не добивме одговор.

Арсовска изјави дека побарала од Владата да се исплати долгот кон ЈСП за бесплатниот превоз на студентите којшто вели дека од 2021 година па наваму не се исплаќа и вели дека е против укинување на слободниот автобуски превоз за студентите.

 – Не го прекинуваме слободното возење за студентите. Има зошто се вика студентски стандард. Најдете јунак кој ќе каже дека не треба да им се плаќа на студентите за тоа. Тоа е владина одлука донесена пред десет години – вели таа.

Од Министерството за „Слободен печат“ велат дека немаат документ, ниту договор со ЈСП и со Град Скопје, но планираат со новиот буџет во 2025 година да ја продолжат оваа одлука.

И министерката вели дека стигнале фактури за наплата, но немаат основ врз кој би ги исплатиле тие средства.

– Точно е дека стигнаа фактури за наплата на огромни средства за кои Град Скопје тврди дека треба да ги исплатиме. Ние спогодба ниту со ЈСП ниту со Град Скопје немаме и јас како министер немам основа врз која би ги исплатила тие средства. Доколку не се најде поинакво решение ние како министерство ќе мора да одиме на суд, а тоа така и ќе биде. Ниту јас ниту оваа Влада беше таа која ветуваше бесплатен превоз за сите. И ние за бесплатниот превоз за сите не можеме да одговараме – изјави Јаневска.

Средношколците ќе имаат бесплатен јавен превоз, но дали ќе биде безбеден и навремен?

Во моментов, како што изјави директорот на Јавното сообраќајно претпријатие – Скопје, Драги Кушовски сообраќаат недоволен број автобуси за пополнување на летниот возен ред. ЈСП има недостиг од 40 автобуси за пополнување на летниот возен ред. Кушовски вели дека ЈСП во моментов располага со околу 190 автобуси, а за да биде пополнет летниот возен ред потребни се 235 автобуси.

– Се надевам дека институциите ќе најдат сили да му помогнат на ЈСП, бидејќи со овој возен парк со кој што располагаме не можеме да го покриеме постоечкиот зимски возен ред. Ние не сме ни од далеку близу да го покриеме тој зимски возен ред. Правиме некои оптимизации во рамките на претпријатието, не знам дали ќе имаме доволно време да се почне со оптимизации на возни редови и не знам дали ќе имаме доволно време да ги направиме до 1 септември, бидејќи секоја оптимизација на возен ред мора да помине преку Советот на Град Скопје – рече Кушовски во интервју за МИА.

Од Организацијата за дијалог и афирмација на средношколците и студентите – ОДАС од Град Скопје бара до почетокот на учебната година да обезбеди автобуси кои ќе сообраќаат навремено и ќе бидат достапни за учениците и студентите да може непречено да одат на настава.

Во допис до медиумите ОДАС укажува дека „нефункционалниот и несигурен јавен превоз може да ги остави средношколците и студентите без начин да стигнат на училиште или факултет“.

– Тековниот застој и прекин во системот на јавен превоз во Град Скопје доведе до можноста учениците и студентите да останат без сигурен и достапен начин да стигнат до училиште или факултет. Недостигот на сигурен јавен превоз стана пречка за достапното образование на многу ученици и студенти. Од Градот Скопје бараме да се посветат на решавање на овој проблем до септември, односно до почетокот на академската година, при што ќе се обезбедат безбедни и функционални автобуси и ќе се обезбеди навременост на линиите – пишува во реакцијата на ОДАС.

Јавното сообраќајно претпријатие – Скопје долго време се соочува со проблеми. Летово, поради недоволниот број на автобуси граѓаните со часови чекаа  на екстремно високи температури.

Граѓаните периодов беа сведоци и на повеќе инциденти со ЈСП – автобус на кој му блокира воланот се искачи на жардиниера кај „Мавровка“, на двапати автобуси се запалија низ Скопје, а поситните дефекти при возење станаа редовна појава.

Во дел од возилата немаат клими, во некои не работи по еден валидатор, а нема ниту билети да за едно возење.