Во четвртокот Еурофарм Пелистер го претрпе и четвртиот пораз оваа сезона во ракометната Лига на шампионите, откако загуби на гости од ПСЖ со 31:26.

Актуелниот македонски првак веќе втор меч по ред (по тесниот пораз од Кил во Битола) во елитата покажува многу подобри перформанси, и тоа против едни од најголемите фаворити во групата „А“.

Тоа секако го радува и тренерот Александар Јовиќ кој верува дека екипата од Битола е на добар пат. Воедно по завршувањето на натпреварот во Париз му посака на неговиот колега од спротивната страна, нашиот поранешен селектор Раул Гонзалез, сезонава да ја освои ЛШ со ПСЖ.

– Сакам да им честитам на моите ракометари за настапот и секако на тимот на ПСЖ за победата. Не беше лесно да се игра во Париз, но мислам дека одигравме како екипа против моќен состав. Верувам дека сме на добар пат. Раул Гонзалез е голем пријател на македонскиот ракомет и сакам да му посакам баш оваа сезона да ја освои Лигата на шампионите со ПСЖ – рече Јовиќ.

Во следното петто коло нашиот претставник на 19 октомври ќе му гостува на хрватскиот ППД Загреб.

– Одлично го одигравме првиот дел, она што го планиравме, го спроведовме и го изненадивме противникот. До 45 минута бевме во натпреварот, но против нас имавме состав со голема ротација, многу индивидуалци и тие реагираа во второто полувреме. Сепак, задоволен сум како се претставивме во Франција. За мене беше посебно чувство да играме во мојот роден град и пред моето семејство – вели францускиот интернационалец во редовите на Еурофарм Пелистер, Руди Сери.