Августовскиот ФИБА „прозорец“ ни носи два натпревари во рамките од претквалификациите за пласман на Европското првенство, на 25 август, македонската кошаркарска сениорска репрезентација гостува во Данска, а три дена подоцна ќе ја пречека Словачка.

Не одмараа премногу нашите најдобри кошаркари ова лето, пред се затоа што јулските квалификации за Светскиот Куп 2023 ги заменуваат со настап во вториот круг од претквалификациите за Евробаскетот во 2025 година.

Селекторот Александар Јончевски кој ќе има на располагање 12 кошаркари, даде мини-анализа на сработеното во изминатиот подготвителен период.

– Имавме нецели две недели подготовки. Првата ја искористивме за базични подготовки во Маврово и успеавме да поставиме систем според играчите со кои располагаме во овој момент, бидејќи, знаеме дека дел од тие играчи не се појавија на овој собир поради оправдани причини, тоа се повреди“. Првпат почнуваме едни квалификации за ЕП во кои немаме натурализиран играч, тоа ќе биде голем хендикеп за нас, особено што имаме дефицит на високи играчи и ќе се обидеме со она кое располагаме да одговориме на предизвикот Данска – вели Јончевски.

Стратегор очекува оние кои ги одбра да атакуваaт на првиот триумф во овој втор круг од претквалификациите за ЕП.

– Секако дека одиме на победа на натпреварите. Со стручниот штаб работиме веќе подолго време на индивидуалните карактеристики на противникот. Во овие две-три недели Данците не одиграа пријателски натпревари, па ќе ги гледаме нивните претходни натпревари од квалификациите, против Косово и Норвешка. Знаеме со што располага противникот, имаат квалитетни играчи, можам да го издвојам Лудберг кој беше во НБА, а сега потпиша за евролигашот Виртус Болоња. Тој е најголемата опасност за противниците на Данска – рече Јончевски непосредно пред тргнувањето за Нествед, каде во четврток навечер, од 19.00 часот, следува првиот натпревар од претквалификациите за ЕП 2025.