Норвешкиот автор Јон Фосе ја доби Нобеловата награда за литература за 2023 година.

– Фосе ги спојува јазичните корени со природата на своето норвешко искуство – соопшти Андерс Олсон, претседавач на Шведската академија за нобелови награди за литература.

Фосе (64) како дете претрпел тешка несреќа, по која едвај се извлекол жив, но и која оставила силен печат врз неговото творештво. Автор е на драми, кратки раскази и романи, поезија и книги за деца, преведени на повеќе од 50 јазици. Во Франција е прогласен за витез, а Норвешка му се изрази благодарност отстапувајќи му дом во кругот на Кралскатa палата во Осло.

Оставајќи го своето богатство како фонд за награди, шведскиот хемичар, иноватор и творец на динамитот Алфред Нобел во тестаментот забележал дека наградата за литература што ќе го носи неговото име треба да му биде доделена на лице што оставило највпечатлив труд „во идеалистичка насока“.

Во понеделникот Нобеловата награда за медицина или физиологија ја добија Каталин Карико и Дру Вајзман за истражувањата што придонесле за изработка на вакцина против ковид-19, наградата за физика ја поделија Пјер Агостини, Ференц Краус и Ан Лије за генерирање атосекундски светлински пулсеви, а наградата за хемија ја добија Моунги Бавенди, Луис Брус и Алекс Екимов за откритие и синтеза на квантни точки. Денеска на пладне ќе биде објавено кој ја добил Нобеловата награда за мир. Лауреатите добиваат диплома и златен медал, а паричниот фонд за секоја категорија е околу 1 милион долари.