Српскиот кошаркар Никола Јокиќ сè уште нема донесено конечна одлука дали ќе настапи за репрезентацијата на Олимписките игри во Париз следната година, а одлуката ќе ја донесе по консултација со својот тим и семејството.

Ова го изјави првотимецот на Денвер во интервјуто за „Радио-телевизија Србија“ по натпреварот против Чикаго на кој беше исклучен на крајот од првото полувреме.

– Олимписките игри се далеку, многу далеку: Некои луѓе ми ставаат зборови во уста што не сум ги кажал, а првиот што ќе ја знае мојата одлука ќе биде тренерот откако ќе разговарам со мојот тим и семејството по крајот на сезоната – рече Јокиќ.

Двократниот МВП на најсилната кошаркарска лига во светот (НБА) зборуваше и за споменатото исклучување на мечот во „Јунајтед Центар“ за кое никому не му е јасно зошто го доби.

– Судиската одлука е секогаш последна, па нека биде дека сум заслужено исклучен. Најважно е што победивме и им честитам на момците за тоа. Одиграа одличен натпревар, одбраната беше многу добра. Во правите моменти постигнавме кош и се одбранивме – вели Јокиќ.

За српскиот ас на Нагетси важно е тимот да има континуитет и систем на тренинзи кој се чини дека дава резултати. Моментно во Западната конференција Денвер е на четвртото место со учинок 16-9.