Јеменската милитантна група Хути, поврзана со Иран, денеска соопшти дека извршила напад врз брод во северниот дел на Црвеното Море со два беспилотни летала и една ракета, поради наводна врска на бродот со Израел.

Како што јавуваат медиумите, портпаролот на Хутите изјавил дека операцијата е одговор на кршење на нивната одлука за забрана на влез во пристаништата на окупирана Палестина. Нема независна потврда за нападот од поморски извори, а групата не го објави точниот датум на инцидентот.

Според извештаи, минатата недела Хутите нападнале израелски танкер во близина на саудиското пристаниште Јанбу. Минатиот четврток, израелските сили убија премиер и неколку министри на јеменската влада предводена од Хутите, што беше прв таков напад насочен кон високи функционери.

Од 2023 година, Хутите спроведуваат бројни напади врз бродови во Црвеното Море за кои тврдат дека се поврзани со Израел, изразувајќи ја својата „солидарност со Палестинците“ во конфликтот во Газа.