Дел од советничката група на СДСМ во Советот на Град Скопје денеска ќе направат увид во документацијата која ја поседува ЈСП „Скопје“ околу тоа дали и колкав долг има ова јавно сообраќајно претпријатие односно Град Скопје до приватните автобуски превозници. Ова за „Слободен печат“ го најави, Љубица Јанчева координатор на Советничката група на СДСМ во Советот на Град Скопје.

– Имаме намера да направиме увид во целосната документација и да утврдиме кој лаже а кој не. Дека има долг има. Но за да се надмене овој проблем кој се создаде на улиците, надлежна е само градоначалничката. Проблемот треба да се реши час поскоро – вели Јанчева.

Координаторката на Советничката група на СДСМ во Советот на Град Скопје објаснува и дека тие како советници немаат никакви ингеренции ниту пак начин како да се реши овој проблем кој настана поради протестот на приватните автобуски превозници.

Според неа, Советот веќе еднаш му додели дополнителна финансиска помош на ЈСП „Скопје“ а како што рече поучени од претходното искуство дури и свикување на вонредна седница не би дало резултати бидејќи како што истакна, на последната седница кога тие сакале да дебатираат за овој проблем, биле навредувани на говорница.