Јана Атанасовска ќе го има својот настап на ФИС Светското првенство во алпско скијање 2025 во Салбах, Австрија.

В сабота, 15 февруари, македонската скијачка надеж Јана Атанасовска (18) со реден број 63 ќе застане на стартот на еден од најголемите предизвици во нејзината досегашна кариера – слалом трката на ФИС СП 2025 во алпско скијање.

Атанасовска со долгогодишни тренинзи, љубов и истрајност уште еднаш успеа да докаже дека македонските спортисти можат да застанат рамо до рамо со најголемите имиња на светското скијање. Таа е вистински пример за упорност и талент, инспирација за генерациите кои доаѓаат.

Првата трка започнува во 09.45 часот, а втората е закажана попладне во 13:15 часот.

Македонските љубители на спортот ќе можат да ја следат во живо на МРТВ, да навиваат и да ѝ дадат поддршка во овој важен момент за македонското скијање.

Денеска во текот на денот настапи скијачот Виктор Петков кој успешно ја заврши велеслаломската трка и го освои 66 место од 100 натпреварувачи.