Андреј Јакимовски (21, 202) е во тимот на Македонија што треба да стартува во претквалификациите за Европското првенство 2025. Во првиот „прозорец“ се мечот во Данска вечерва во Нествед, а потоа в недела во Скопје се игра против Словачка. Играчот на универзитетот Вашингтон стејт (НЦАА лига) ги заобиколи своите задолженија во тој тим за да и помогне на репрезентацијата добро да стартува во првите два меча. Инаку, за директно да влезе во квалификациите за ЕП 2025, Макeдонија треба да биде прва во групата во која покрај Словачка и Данска е и Норвешка. Натпреварите во нашата група завршуваат во февруари в година.

– Тоа што ќе доцнам на подготовките на мојот универзитетски тим 10 дена малку беше проблем за нив. Но им објаснив колку ми е битно да играм за репрезентацијата и на крај дојдовме до договор по мечевите вреднаш да се вратам таму. Ќе ми биде проблем што доцнам со школото и со подготовките, но не голем – вели Јакимовски.

Тој не може да биде на располагање на националниот тим кога тече НЦАА-сезоната.

– Чест и задоволство ми е да играм за репрезентацијата, би сакал да играм кога ќе имам можност. За време на сезоната во САД не можам да се вратам, но сега кога сум тука, ќе ризикувам 10 дена – вели Андреј.

Младиот играч е среќен во националниот дрес.

– Одлично е чувството да се биде во репрезентацијата. Нов селектор, нов стручен штаб, но чувството е исто. Атмосферата во тимот е супер. Го очекуваме тој меч со Данска. Сакаме да покажеме дека не сме за претквалификации, дека заслужуваме да стигнеме до квалификациите, па да видиме дали можеме да се пласираме на Евробаскетот. Да дојдеме до тој посакуван успех, да ја вратиме нашата кошарка каде што треба. Тоа е долг процес и многу работа, но чекор по чекор ќе го оствариме – смета Јакимовски.

Данскиот тим е анализиран.

– Во данскиот тим имаат еден сериозен играч, НБА кошаркарот Лундберг. Се договоривме како да играме. Треба да се фокусираме повеќе на него, но и на нас самите, во напад и во одбрана. Ако тоа го направиме имаме големи шанси за победа. За Словачка уште е рано. Мислиме на Данска – вели Андреј.

Според него тимот на Македонија е добро одбран.

– Мислам дека овој тим има квалитет, играчи на секоја позиција. Во најмала рака треба да ги поминеме овие квалификации. Потоа ќе видиме. Останува на нас да покажеме што знаеме и да победиме на овие мечеви – вели Јакимовски.

Андреј е задоволен со новиот селектор Александар Јончевски.

– Супер е новиот селектор. Го знаеме затоа што беше во стручниот штаб и порано. Одлично се вклопуваме со него и мислам дека сега се е во најдобар ред – вели крилото Јакимовски.

Тој веќе трета година студира и настапува за универзитетот Вашингтон стејт во НЦАА лигата.

– Ова ќе ми биде трета година. Очекувам позитивни работи. Ова е сезона кога треба да направам голем скок во поентерската и во лидерската улога. Тренерите очекуваат од мене многу. Имаме супер тим, се надеваме на подобар резултат од лани. Се надеваме дека ќе одиме на „марч меднес“ сезонава („марч меднес“, завршницата на НЦАА лигата н.з.). Лани за две победи не успеавме да се пласираме на „марч меднес“ – вели Андреј.