Можат ли мачките да јадат јагоди? Иако овошни оброци не се неопходни за мачките, некои можат да покажат интерес да пробаат малку од ова пролетно/летно овошје. Ветеринарите велат дека мачките можат безбедно да јадат јагоди, но во ограничена количина, пишува „ДСпрусПет“.

Иако јагодите се сметаат за безбедни и нетоксични за мачките, потребна е претпазливост, бидејќи ова овошје содржи многу шеќер, што не е препорачливо ни како честа ужина. Освен тоа, јагодите не нудат значителна хранлива вредност за мачките. Тие се богати со шеќери, а мачките се месојади и им се потребни протеини. Јагодите содржат витамин Ц, фолна киселина, манган и калиум и се добар извор на антиоксиданси. Витамините и минералите се здрави, но мачките ги добиваат преку комерцијалната храна која им ја давате секојдневно.

Позитивната страна на јагодите се однесува на менталната стимулација – за некои мачки испробувањето на оваа намирница може да биде забавно, па ако им се допадне, малку јагода може повремено да се даде како награда.

Ризици од консумирање јагоди кај мачки:

• Нерамнотежа во исхраната: Посластиците, вклучувајќи ги јагодите, не треба да надминуваат 10 отсто од дневниот калориски внес.
• Гастроинтестинални нарушувања: Јагодите и другото овошје може да предизвикаат мачнина, повраќање и дијареа.
• Влошување на постоечки болести: Мачки со дијабетес не треба да консумираат јагоди поради високото ниво на шеќер.
• Загушување: Постојат ризици од загушување со големи парчиња овошје, па затоа јагодите секогаш треба да се сечат на мали залчиња.
• Алергиска реакција: Иако ретко, може да се јави алергија. Симптоми: осип, оток на лице или екстремитети, силно чешање, воспалена кожа, повраќање, тешко дишење, па дури и колапс.
• Проблеми со варењето: Мачки со интолеранција кон јагоди може да имаат: повраќање, дијареа, намален апетит, зголемено лачење плунка и гасови.

Ако негативните симптоми траат подолго, задолжително однесете ја мачката кај ветеринар.