Градежникот Бал Синг објави интересна приказна на Фејсбук, по неговото откритие во куќа што ја реновирал во Нотингем, Велика Британија.

Синг ги средувал подовите на куќата, кога забележал тегла полна со стари писма и од љубопитство ја отворил. Кога ја прочитал содржината, не можел да ги задржи солзите.

Писмата биле во оригинални пликови со поштенски марки од Бирмингем и биле напишани во 1971 година. Тие биле напишани од извесна Бет, а упатени до Џеј Вард од Котгрејв. Испраќачот како своја адреса го навел предградието Њутаун во Бирмингем, пишува „Мирор“.

Писмата биле напишани рачно, помеѓу мај и октомври, и ја опишуваат врската помеѓу двајца љубовници. Како завршиле во Нотингем, скриени под даските, останува мистерија.

„Драг мој, се надевам дека ќе се вратиш од Ливерпул. Не знам каков ден имаш, но мојот не беше убав. Не излегов, затоа што не беше покрај мене. Цело време мислев на тебе, многу ми недостигаш. Едвај чекам повторно да бидеме заедно“, напишала Бет во едно писмо.

Во втората, таа го известува својот сакан дека безбедно се вратила дома по нивната разделба.

„Најмил, стигнав дома околу 10 и 30, ми недостигаш лудо. Останав во солзи кога автобусот тргна. Срцето сакаше да скокне од градите“, напишала таа.

Во секое писмо Бет нагласува колку Џеј ѝ значи и дека го чека моментот кога ќе бидат „засекогаш заедно“.

„Те сакам повеќе отколку што некогаш ќе знаеш. Ова беше одличен викенд, само да бидам со тебе. Ти си неверојатна личност, никогаш не се менувај“, пишувало во писмата.

Расплаканиот градител Синг, на старите писма нашол и нацртани срца со имињата Бет и Џеј.

Тој смета дека тие имале помеѓу 16 и 20 години во раните 1970-ти, што значи дека сега би можеле да имаат помеѓу 69 и 73 години.

Синг сега се обидува да го најде заљубен пар преку социјалните мрежи за да им ги достави писмата, кои се доказ за нивната голема љубов.