Израелските власти очекуваат 20 израелски заложници да бидат ослободени во недела или понеделник, објави Ројтерс, повикувајќи се на неименуван израелски функционер.

Во моментов Хамас држи 48 израелски заложници, од кои се верува дека 20 се уште се живи.

Американскиот претседател Доналд Трамп претходно изјави дека очекува заложниците што ги држи Хамас во Газа да бидат ослободени во понеделник, по мировниот договор меѓу Израел и Хамас, промовиран од неговата администрација.

Трамп претходно објави на социјалната мрежа „Truth Social“ дека Израел и Хамас ја потпишале првата фаза од мировниот план, кој предвидува ослободување на сите заложници и повлекување на израелските трупи на договорената линија.

„Многу сум горд што објавувам дека Израел и Хамас ја потпишаа првата фаза од нашиот мировен план. Ова е голем ден за арапскиот и муслиманскиот свет, Израел и САД. Им се заблагодаруваме на медијаторите од Катар, Египет и Турција за нивната соработка“, рече Трамп, додавајќи: „Блажени се миротворците“.