Врховниот суд на Израел во средата со убедливо мнозинство од десет гласа спрема еден одлучи дека лидерот на партијата Шас, Ариех Дери, не може да биде министер во новата влада, поради пресудата од февруари лани, со која бил осуден за даночна измама. Дери е клучен сојузник на премиерот Бенјамин Нетанјаху, а од неговите пратеници зависи владејачкото мнозинство.

Судот му наложи на Нетанјаху да го разреши Дери од функцијата, а тоа може да ја втурне земјата во политичка криза.

Партијата Шас на Дери – која освои 11 места во 120-члениот израелски парламент, Кнесетот, во ноември и е клучна компонента на коалицијата на Нетанјаху – веднаш возврати, нарекувајќи ја судската одлука „произволна и без преседан“.

„Судот денес ги фрлил ставовите и гласовите на 400.000 гласачи на движењето Шас. Денес судот всушност пресуди дека изборите се бесмислени. Одлуката на судот е политичка и извалкана“, велат од верската партија на Сефардите.

Од Високиот суд беше побарано да одлучи дали е правно разумно да се назначи Дери на функции во кабинетот на Нетанјаху и покрај неговата пресуда за даночна измама. Судиите одлучија дека неговото назначување е „неодржливо“.

Дери беше член на Кнесетот во времето кога беше осуден за даночна измама минатата година. Тој тогаш поднесе оставка на пратеничката функција.

Сојузниците на Дери оваа недела сигнализираа дека лидерот на партијата Шас нема да поднесе оставка од министерската функција дури и ако судската одлука биде против него. Неговото одбивање да даде оставка – или одбивањето на Нетанјаху да го разреши – потенцијално создава уставна криза.