Израелскиот парламент усвои закон со кој се забранува агенцијата на ОН за палестински бегалци (УНРВА) да врши „било какви активности“ или да дава каква било услуга во Израел.

Законот беше усвоен со 92 гласа „за“ и 10 „против“ и ќе стапи на сила 60 до 90 дена откако израелското Министерство за надворешни работи ќе ги извести ОН.

Како што пренесува „Тајмс оф Израел“, Израел има три месеци да ги одреди ресурсите и персоналот за преземање на одговорностите со кои моментално управува УНРВА, вклучително и Источен Ерусалим и Газа, пишува Гардијан.

Гласањето за друг предлог-закон за прекин на дипломатските врски со Aгенцијата, исто така, се очекува подоцна во вечерните часови.

Законите забрануваат персонал на агенцијата на ОН и помошта да минуваат низ израелските територии. Иако технички не и забранува на УНРВА да работи на окупираните територии како Газа и делови од Западниот Брег контролирани од палестинските власти, законот значително ќе ја попречи способноста на Агенцијата да реагира на итни случаи во овие области.

УНРВА долго време беше цел на критики од израелската влада, особено по нападот на Хамас на 7 октомври 2023 година.

УНРВА обезбедува образование, здравствени услуги и стручна обука за палестинските бегалци. Станува збор за голема организација која работи на палестинска територија и вработува 13.000 луѓе само во Газа.

Забраната за работа значи дека УНРВА нема да може да достави помош во Газа, наведува Ал Џезира, додавајќи дека 3 милиони Палестинци ќе останат без хуманитарна помош.