Во Уметничкиот центар „Арт хаб“ (ГТЦ, 2 кат, локал 306) на 5 јуни, со почеток во 20 часот, ќе биде отворена самостојната изложба на слики насловена „Допир“ од Гордана Јаневска.

На изложбата ќе бидат презентирани околу 30 слики изработени во техниката акрил на платно. Ова е прва самостојна изложба на Јаневска во Македонија, но во нејзината биографија се забележани нејзините претставувања во Истанбул, Бодрум, Белград, Лондон, Форли.

– Откривање на говорот на топлата лирика и емпатија во сликарскиот изблик на Гордана Јаневска и јасноста на тоналитетот е карактеристика која возбудува и ескалира во жарот на потезите. Таа преку своите творби, повеќето на темна основа со фигуративен приказ на портретот, фигурата на коњот или, пак, мртвата природа, ни дава впечаток на рефлекс на фаќање на сенката и преклопување на фигурата од двете страни во едно. Во полна снага е чувството на фаталност во прикажаните сензации, каде Јаневска се ангажира живо и во суштината на видливото. Помеѓу светлото и темното, делото се конфронтира и станува сцена на која може да се дефинира публиката како актер што е и поентата на човековиот квалитет – напиша кураторката Маја Крстевска во рецензијата за сликарството на Јаневска.

За сите љубители на уметноста изложбата ќе трае до 18 јуни 2024 година, известија од Уметничкиот центар „Арт хаб“ – Скопје.