Безвременската песна „Булка“ од големиот албански поет Александар Ставре Дренова Асдрени, напишана пред 100-ина години, била инспирација за ликовната уметница Дита Старова Ќерими да наслика 15 дела, работени во техниката акрил на платно, на кои главниот мотив се булките. „Црвениот, кревок цвет на булката, кој пркоси на бурни ветрови, станува симбол на универзалната надеж. Додека цветаат булките ќе се обновува и надежта за совладување на најголемите тешкотии на животот. Оживувајќи ја булката на сликарското платно сакам да ги разбудам поривите на радост и надеж во човековата душа“, вели Старова Ќерими.

Во својата професионална биографија Дита Старова Ќерими досега има нотирано 14 самостојни и над 50 групни изложби во Македонија, САД, Франција, Турција и Косово. Добитничка е на бројни домашни и странски признанија, како и на наградата „13 Ноември“ на Град Скопје. Актуелен директор на Националната галерија на Македонија е од 2015 година, период во кој освен на организирање и раководење со многубројни изложби работи и на реализација на дел од значајните проекти за реставрација на Спомен-куќата на Лазар Личеноски и на изложбените објекти Даут-пашин амам и Чифте амам, кои претставуваат заштитено културно наследство. Нејзината самостојна изложба е поставена во Културно-информативниот центар во Скопје и ќе може да се посети до 22 декември.

(Текстот е објавен во „Културен печат“ број 60, во печатеното издание на „Слободен печат“ на 12-13 декември 2020)