Во галеријата на Младинскиот културен центар во Скопје на 3 декември, во 19 часот, ќе биде отворена изложба на фотографии на Боро Рудиќ со наслов „Треперење“. На отворањето на изложбата ќе биде промовирана и фотокнига со истиот наслов.

Преку оваа изложба и фотомонографија, авторот истражува можност за редефинирање на перцепцијата на естетиката во однос на традиционалните норми. Природата е најчестиот мотив во фотографијата, често окована со одредени правила и табуа кои ја обликуваат нашата визуелна перцепција. Што се случува со нашата перцепција како набљудувачи (или фотографи) кога излегуваме надвор од зоната на удобност и ја гледаме природата на сосема поинаков начин?

Оваа изложба има за цел да ги предизвика воспоставените визуелни концепти, поттикнувајќи ги гледачите да ја преиспитаат и да го реинтерпретираат она што го сметаат за естетско во природниот свет.

Изложбата тежи кон ослободување од стандардните канони на убавина, овозможувајќи нов поглед на природата преку иновативни и неконвенционални техники на фотографирање. Преку овој проект, авторот се надева дека ќе се отвори дијалог за флексибилноста на естетските норми и ќе се поттикне креативно размислување надвор од традиционалните рамки.

– Како оригинално истражување на границите на човечката перцепција и можностите на современата технологија во сферата на визуелните уметности, во кое е максимално нагласен и личниот стил на уметникот и неговите преференци во изборот на естетските компоненти, изложбата на Боро Рудиќ претставува крупен иновативен чекор во истражувачките техники во подрачјето на фотографијата и возбудливо визуелно-естетско доживување – истакнува филозофот Ферид Мухиќ за изложбата и фотокнигата на Рудиќ.

Изложбата „Треперење“ во галеријата на МКЦ во Скопје ќе биде поставена до 15 декември оваа година.