Дебитантската збирка поезија „Ќумур смоквин млеч“ од младиот поет Стефан Спасовски е објавена во издание на „Илика“, а промоцијата се одржа на 3 јули во „Буква“. Стихозбирката е наградена со „Антев часовник“ од Меѓународната поетско-културна манифестација „Анте Поповски – Антево перо“ за необјавена поетска збирка од млад автор.

Наградата ја доби со следново образложение: „Поезијата на Стефан Спасовски, со креативен и иновативен наслов ’Ќумур смоквин млеч‘, е интересно патување по сетилните меридијани на неговта млада душа. Песните, иако се пишувани во традиционален дух и изобилуваат со сложени внатрешни рими, инверзии, фигури на звукот и метафори, сепак имаат еден модернистички начин на соопштување на доживеаните чувства. Експерименталноста, што е една од карактеристиките на оваа поезија, симпатично комуницира со интертекстуалноста притоа создавајќи оригинални стихови. Овие песни понекогаш се мрачни и песимистични, но речиси секогаш содржат хумор и игривост кои не дозволуваат да превлада мрачниот тон.“

Стефан Спасовски е студент на Катедрата за македонски јазик на Филолошкиот факултет „Блаже Конески“ во Скопје. Дел е од тимот на кафе-книжарницата „Илика“, а во Здружението за афирмација на младинската култура „Култура Бета“ работи врз јазично уредување и редакција на текстовите. Бил дел од уредничкиот одбор на студентското списание „In  medias reѕ“.

Се занимава со пишување есеи и поезија. Има учествувано на повеќе поетски читања, како: „Поетска епизода“, „Отскочна даска“, „Клинци“ и на Скопскиот поетски фестивал. Негови есеи, критики и поезија се објавени на „Култура Бета“, „Репер“, „In medias res“, како и во публикацијата „Визуализација на современата македонска книжевност“ (2025).

(Текстот е објавен во „Културен печат“ број 288, во печатеното издание на весникот „Слободен печат“ на 5-6.7.2025)