Во кафе-барот „Кашмир“ на 5 мај, во 19 часот, ќе се одржи промоцијата на новата прозна објава од Максим Ристески, збирката раскази „Нешто трето“. Промотори на книгата ќе бидат Ана Мартиноска и Ивица Димитријевиќ, а настанот ќе го модерира Игор Анѓелков.

Станува збор за 236. издание во едицијата „ПРОаЗА“ на издавачката куќа „Или-или“, а втора книга на Ристески, по романот „Пештера“ од 2022 година.

– Расказите на Максим Ристески кријат комплексни светови и длабоки пораки за промените кои се случуваат во духовната стварност, а кои без сомнение ќе бидат предизвикувачки за македонската читателска јавност. Обликувани во јасен, богат и сликовит израз, со обмислени и динамични реченици и внимателно селектиран избор на зборови, расказите од оваа збирка на Ристески се потврда за стилската особеност и дарба на овој раскажувач, кој допрва треба да биде вистински препознаен од критиката и публиката – напиша Ана Мартиноска во освртот кон новата книга на Ристески.

Максим Ристески (Скопје, 1973) со пишување се занимава повеќе од 30 години, и како новинар, копирајтер, текстописец, сценарист… Бил музичар, а продолжува да се занимава и со ликовна уметност. „Нешто трето“ му е прва збирка раскази, по романот „Пештера“, известија од издавачката куќа „Или-или“.