Претседателката на Државната комисија за спречување на корупцијата, Билјана Ивановска во гостување на Сител телевизија оценува дека извештајот на Европската Комисија за напредокот на Македонија е аларм со црвени светла.

Оценката на Европската Комисија е дека одиме назад. Ова е аларм со сите црвени светла. Или ќе се одбиеме од дното да зачекориме по правиот пат, или ќе продолжиме да тонеме, рече таа.

Таа подвлече дека Антикорупциска има отворено предмети за повеќе појави, анализирала и препраќала сознанија до соодветните институции, но сепак, станува збор за превентивен орган, а не за суд или обвинителство.

-Нашата работа е дека ние всушност сме како доктор за систематски преглед. Не може таквиот доктор да биде хирург. Хирург е обвинителот или судијата. Крајната цел на нашата работа е подобрување на системот на контроли и намалување на ризиците од корупција. Потребно е да се намали политичкото влијае, за да дишат институциите, додаде таа.

Антикорупциска постои, вели Ивановска, за да упатува на слабостите и појавите и да се предлагаат законски измени каде Законите се недоречени. Во сите земји постојат вакви органи, појаснува претседателката на ДКСК.

Таа е задоволна од ингеренциите што ги има Антикорупциската комисија. Критикуваше дека најголемиот ризик е кога вистинските луѓе не се на вистинските позиции. Европската Комисија со години наназад укажува органите да ги следат препораките на ДКСК.

-Кај нас проблемот е неказнивоста. Не сме ја прекинале соработката со Обвинителството, повторно ќе поднесувам иницијативи за кривично гонење, посочи Ивановска.