Иван Кукиќ викендов во Скопје го промовираше својот деби албум „Sunday Vibes“
Саботната промоција на Иван Кукиќ во Скопје на првенчето Sunday Vibes помина прекрасно, над сите очекувања, укажувајќи дека медиумите го препознаваат талентот на овој извонреден млад музичар.
Викендов во кафулето АудиоКултура во Скопје се одржа промоцијата на деби албумот „Sunday Vibes“ на мултиталентираниот музичар Иван Кукиќ и актуелниот бас гитарист во Триото на Влатко Стефановски.
Препорачано
Албумот летово го издаде „Кроација рекордс“, а Кукиќ и неговиот бенд за првпат го претставија на фестивалот Славонија Фест – СМС 200 во Славонски Брод.
Музичкиот менаџер Владимир Мандичевски – Манде со одбрани зборови им се обрати на присутните на скопската промоција, раскажувајќи анегдота кога легендарниот Дадо Топиќ му рекол дека слушнал дека „Влатко Стефановски има момче што го убива басот“.
И навистина, Иван Кукиќ е одличен басист, но и воопшто инструменталист, бидејќи покрај бас гитарата одлично владее со контрабас, гитара, пијано, тапани и народни инструменти. Покрај тоа, одлично пее, компонира и пишува аранжмани. Тоа го докажа на својот деби албум „Sunday Vibes“, каде им беше домаќин на истакнати музичари – Дадо Топиќ, Влатко Стефановски, Теодоси Спасов, Сакис Даволис…
На промоцијата во Скопје, Иван и неговиот бенд изведоа неколку композиции од албумот во акустични аранжмани, на задоволство на присутните пријатели, музичари и седмата сила која во голем број го поддржа.
На промоцијата присуствуваа и Влатко Стефановски и неговиот син Јан, како и музичарот Баже Маротов, наставникот на Иван по контрабас, во средното музичко училиште во Скопје. Регионалната публика го памети Маротов по неговите маестрални бас-делови во песната „Овој плес даме бирају“ од Бијело Дугме, од албумот „Успаванка за Радмила М“.
Родителите на Иван, Ленче и Горан Кукиќ, угледни македонски музичари, признати низ целиот регион, беа особено горди на својот единец.
Со ветување дека во наредниот период интензивно ќе го презентира албумот и во родната Македонија и пошироко, Иван истакна дека воодушевувањето на публиката со неговата музика за него претставува момент во кој се чувствува како да е во друга димензија, целосно предавајќи се на своите емоции.
Влатко Стефановски имаше само пофални зборови за младиот соработник, истакнувајќи дека заедно свиреле на повеќе од 130 концерти низ светот.
